İran Türkiyəni dialoqlara dəvət etdi

İran səmimi dialoqlara hazır olduğunu bəyan edərək, Türkiyəni danışıqlara səslədi.

Ölkə.Az xəbər verir ki, İran prezidentinin köməkçisi Əli Əkbər Salihi Türkiyənin böyük dövlət olduğunu vurğulayaraq, bölgə problemlərinin həlli məsələsində İranın Ankara ilə səmimi müzakirələrə hazır olduğunu bildirib.

Məbuat nümayəndələri qarşısında çıxış edən Salihi deyib: "Bölgədə sabitliyi bərqərar etmək üçün Türkiyə və eyni zamanda Səudiyyə Ərəbistanı ilə danışıqlara başlamağa hazırıq. Okeanın o tayından gələn qüvvələrə ehtiyac duymadan səmimi bir şəraitdə bölgə problemlərini müzakirə edə bilərik".

İran Atom Enerjisi Təşkilatının sədri vəzifəsini də icra edən Salihi qeyd edib ki, bölgənin iki böyük dövləti olan Türkiyə və Səudiyyə Ərəbistanının bu torpaqlarda böyük rolu var. Bu rol vəziyyəti gərginləşdirmək yox, sabitlik və təhlükəsizlik üçün istifadə edilməlidir.

Hikmət
Ölkə.Az