Qara dənizdə gəmi qəbiristanlığı tapılıb

"Dəniz arxeologiyası Qara dəniz layihəsi" tərəfindən təsis edilmiş beynəlxalq ekspedisiya Qara dənizin dibində 40-dan çox gəmi aşkar edib.

Ölkə.Az xəbər verir ki, bu gəmilər Bizans və Osmanlı imperiyalarına məxsusdur.

Dənizin 1800 metrlik dibini araşdırmaq üçün alimlər tərəfindən müasir aparatlardan istifadə edilib.

Ekspedisiyanın rəhbəri Con Adamsın verdiyi məlumata görə, tədqiqatların məqsədi Qara dənizin tarixini dəqiqliklə araşdırmaqdır. Arxeoloqlar batmış gəmilərin qalıqlarını və gövdələrini lentə alıblar. Tədqiqatçıların fikrinə görə, dərinlikdə oksigen miqdarı az olduğu üçün gəmilər çox xarab olmayıb. Axtarışlar İstanbulu Qara dəniz sahilindəki dövlətlərlə birləşdirən qədim dəniz yolu xəritəsi əsasında aparılıb.

Alimlərin fikrinə görə, bu tapıntı Qara dəniz sahillərində yaşayan cəmiyyətlər haqda yeni məlumatlar əldə etməyə vəsilə olacaq.

Qeyd edək ki, "Dəniz arxeologiyası Qara dəniz layihəsi" mərkəzi İngiltərədə yerləşən beynəlxalq təşkilatdır.

Hikmət
Ölkə.Az