Dünəndən bu günə Tramp
Donald Tramp 40 ildir ki, fərqliliyi ilə bir brendə çevrilib. Donaldın necə bir insan olduğu haqda suala cavab verən yazıçılar birdən-birə ulduzu parıldayan Trampı belə təsvir ediblər.
Tramp və onun ailəsi haqda iki kitab yazan Qvenda Bleyrin fikrinə görə, Tramp yaxşı ticarətçidir və özünə həddindən çox inanır. Əgər biri ona etdiyi işin uğursuz olduğu fikri ilə gələrsə, Tramp üzgün formada reaksiya verərək, eşitdiklərindən son dərəcə narahat olduğu görünər və lazım gəlsə dərhal qarşı tərəfə hücuma keçər.
Obrayn bildirib ki, Tramp əslində 7 yaşlı bir uşaqdır. Ciddi-cəhdlə çalışmasına baxmayaraq o emosionallıqdan əl çəkə bilmir və hədsiz dərəcədə özünəvurğun bir şəxsiyyətə sahibdir. Şəxsi həyatı ilə də çox maraqlanır.
Bleyr və Obrayn Donald Trampın televiziyada göründüyü kimi şəxsi həyatda da eyni olduğu məsələsində həmfikirdirlər. Bleyrə görə, Trampın danışıq tərzi ilə şəxsiyyəti eynidir. Bu səbəbdən əsl sual Trampın necə bir insan olmasından ziyadə, Respublikaçılar partiyasından namizədliyini necə əldə etməsidir. Çünki Tramp hər cəhətdən bu günə qədər ən qeyri-adi namizədlərdən biridir.
Trampın şəxiyyətini tənqid etmək nə qədər asan olsa da, adıçəkilən yazıçılar onun bir çox amerikalının duyduğu qəzəbi idarə etmək və istiqamətləndirmək məsələsində nə qədər müvəffəq olduğunu gözdən qaçırmamaq lazım olduğuna inanırlar.
Bleyr də Obraynla həmfikirdir: "Əyalətdəki insanlarda təcrid olunduqlarına dair, işləri davam etdirən elit təbəqəyə, dağılmış bir Konqresə, ölkənin yalnız kiçik bir faizini təşkil edən insanların hər şeyi öz maraqlarına görə idarə etdiyinə qarşı bir inciklik hissi var. Bu zaman günahkar lazımdır. Belə bir anda Tramp ortaya çıxır və qaçqınlardan meksikalılara, müsəlmanlardan qadınlara və yalançı mətbuata qədər günahlandırıla biləcək insanlardan ibarət uzun bir siyahı təqdim edir".
Hələ uşaq ikən ona aşılanmış olan özünəinamı Trampın kütlə tərəfindən cazibədar qəbul edilməsi səbəblərindəndir. Şəxsi həyatında Donald siqaret və içkidən uzaq biridir.
Bleyrə görə, Trampın ən böyük istəyi pul qazanmaq və nəyin hesabına olur-olsun qalib tərəf olmaqdır. Donald və ailəsi Norman Vinsentin yazdığı "Müsbət düşüncənin gücü" kitabının təsirinə düşüb. Kitaba görə, ən vacib şey uğurdur və bu Tanrının planının bir parçasıdır.
Tanrının bir planı olsa da, Trampın heç bir planı yoxdur.
Keçmişdə də Tramp üç dəfə namizəd olacağını bildirsə də, məsələ ciddiləşdikdən sonra fikrindən vaz keçmişdi. Obraynın fikrinə görə, Tramp uzun müddətə hesablanmış planlar qurmur.
Tramp, qanuni bir əmlak sahibkarından bir televiziya ulduzuna, böyük biznesdən böyük siyasətə qədəm qoyan bir insana çevrildi.
"Güman edirəm ki, Tramp, bütün bu diqqət və pulsuz təqdimatı cəmi bir neçə aksiya həyata keçirərək əldə etdiyinin fərqinə vardı. O, bunun müdhiş və pulsuz bir marketinq olduğu barəsində haqsız sayılmaz. Amma yenə də, onun beyninin dərinliklərində bu məqama qədər necə gəldiyini sorğu-sual edir, özünün prezident kürsüsü üçün uyğun olmadığını etiraf edir", - deyə Brayn yazır.
Yazıçılar Trampın kök salmış, sabit siyasi görüşlərinin olduğuna əmin deyillər. Çünki Respublikaçıların namizədi yaxın keçmişdə müstəqil və sol düşüncəli fikirləri müdafiə edib. Donaldın bu gün Respublikaçı cəbhədə yer alması yəqin ki, belə bir imkanın yalnız Respublikaçılar Partiyasında ortaya çıxmasından qaynaqlanır. Tramp hamının gözü qarşısında ona dəfələrlə lağ edən Barak Obamaya xüsusi nifrət hissi duyur.
Bleyr bildirib ki, Tramp hər hansı bir ideologiya ilə özünü məhdudlaşdırmır, bu səbəblə özünün bəzi şərtlər daxilində həlli mümkünsüz görünən problemləri həll etməsi mümkündür.
Tramp əyləncəli və sehrli bir xalq fiquruna çevrilib. Bəziləri hesab edir ki, Tramp təhlükəli adamdır. Çünki qəsdən şovinist görünməyə çalışır. Buna görə də ona nüvə düymələrini işə salmaq səlahiyyəti, yəni ABŞ prezidentliyi verilməməli idi.
Lakin bir gerçək var, Donald Tramp artıq ABŞ prezidentidir və bir neçə aydan sonra həm öz ölkəsini, həm də qismən dünyanı idarə edəcək.
Hikmət
Ölkə.Az
