Politoloq: "Peşmərgənin Kobaniya keçməsi ABŞ-ın istəyidir"

Bu gün türk mediasında İraqın şimalındakı kürd administrasiyasının tabeliyində olan bir qrup “Peşmərgə”nin (Şimali İraqdakı kürd polisinin) Türkiyə ərazisindən Suriyanın Kobani şəhərinə keçmək üçün Şanlıurfaya getməsi barədə xəbərlər yayılıb.

Məlumatlara görə, Beynəlxalq Ərbil Hava limanından Türkiyəyə keçən peşmərgə qüvvələri artıq Şanlıurfanın GAP hava limanına eniblər.

Məsələ ilə bağlı Ölkə.az-a öz fikrini politoloq Fərhad Mehdiyev bildirib. Politoloqa görə, Habur sərhəd buraxılış məntəqəsindən keçəcək olan peşmərgələrə yerli xalqın böyük dəstək verməsi, Türkiyə üçün heç də yaxşı siqnal deyil.

"AKP höküməti bu məsələdə ABŞ-ın istəklərinə qarşı çıxa bilmədi. AKP haqlı olaraq peşmərgələrin oraya keçməsinə qarşı çıxırdı, çünki Kobanidəki kürdlərin güclənməsi Türkiyənin milli maraqlarına uyğun gəlmir. Bunun yerinə Türkiyə Azad Suriya Ordusunun ora getməsini istəmişdi, amma buna nail ola bilməmişdi.

Digər tərəfdən də, özəlliklə Habur sərhəd buraxılış məntəqəsindən keçəcək olan peşmərgələrə yerli xalqın böyük dəstək verməsi, Türkiyə üçün heç də yaxşı siqnal deyil, bu, kürdlərin müstəqillik və birləşmə istəklərindən xəbər verir".

Qeyd edək ki, bir müddət hava limanında gözləyən peşmərgə qüvvələrinin avtobuslarla Suruça getməsi gözlənilir.

Fatimə İbrahimova
Ölkə.az