"Toyota" avtomobil sahiblərinə kompensasiya ödəyəcək

"Toyota" şirkəti ABŞ-dakı avtomobil sahiblərinə paslanmaya görə kompensasiya ödəyəcək.

Ölkə.Az xəbər verir ki, Amerikadakı Toyota markalı avtomobillər korroziyaya uğrayıb. Buna səbəb isə, ramaların pasdan kifayət qədər qorunmaması olub.

Los-Ancels məhkəməsinin qərarı ilə yapon avtokonserni son 12 il ərzində satılan bütün ramalı avtomobilləri yoxlamalı, hansı maşınlarda ramaları dəyişdirmək lazım olduğunu dəqiqləşdirməlidir. Bundan başqa şirkət öz hesabına avtomobilini təmir edənlərin xərclərini qarşılamalıdır. Kompensasiyanın ümumi məbləği 3.375 milyard dollardır. Bir avtomobilin təmiri üçün 15 min dollar tələb olunur.

Şirkət könüllü surətdə dəyən ziyanı ödəməyə razı olsa da, məsələ ilə bağlı özünü günahkar bilmir. Eyni zamanda "Toyota" zərərçəkmişlərin hər birinə 2.5 min dollar, vəkillərə isə 9.75 milyon dollar ödəməlidir.

Hikmət
Ölkə.Az