Tramp və ailəsinin mühafizəsi neçəyə başa gəlir?

ABŞ-ın yeni seçilmiş prezidenti Donald Tramp və ailəsinin mühafizəsi Nyu-York şəhərinin rəhbərliyinə baha başa gəlir.

Ölkə.Az xəbər verir ki, yeni prezidentin və ailəsinin bir günlük mühafizə xərci 1 milyon dollardır.

Tramp Ağ evə köçdükdən sonra bu xərclər elə də azalmayacaq. Çünki onun həyat yoldaşı Melaniya və 10 yaşlı oğlu təhsil ilinin sonuna qədər "Trump Tower"dəki evdə yaşayacaqlar. Donald isə müntəzəm olaraq ailəsinə baş çəkəcək.

Nyu-York polis idarəsinin nümayəndəsi Con Miller bildirib ki, Trampın böyük övladları və nəvələri də ABŞ xüsusi xidmət orqanları və polis əməkdaşları tərəfindən qorunacaq.

Nyu-York meri Bill De Blazio bir müddət əvvəl bildirmişdi ki, prezidentin mühafizəsi üçün maliyyə yardımı ehtiyacı yarana bilər. Onun sözlərinə görə, şəhər hakimiyyəti qısa müddətə federal hökumətə Nyu-York polis idarəsinin müəyyən xərclərinin qarşılanması üçün müraciət edəcək.

Prezident və yeni seçilmiş prezidentin mühafizəsi üçün xüsusi xidmət orqanı məsuliyyət daşıyır. Yerli hakimiyyət bu məsələdə dəstəyini əsirgəməməlidir. Tramp və ailəsi dünyanın ən iri şəhərlərindən birinin izdihamlı rayonunda yaşadığı üçün mühafizə xərcləri çoxalıb.

Hikmət
Ölkə.Az