Gürcüstanda hökumətin yeni tərkibi təqdim edildi

Gürcüstanın baş nazirinin səlahiyyətlərini müvəqqəti icra edən Georgiy Kvirikaşvili yeni hökumətin tərkibini açıqlayıb.

Ölkə.Az xəbər verir ki, Georgiy Kvirikaşvili brifinqdə təqdim etdiyi tərkib parlament tərəfindən təsdiqlənməlidir.

Yenilənmiş nazirlər kabinetinin tərkibində cəmi bir neçə yeni sima var. Maliyyə naziri vəzifəsinə keçmiş iqtisadiyyat naziri Dmitriy Kumsişvili, iqtisadiyyat naziri postuna isə onun müavini Georgiy Qaxariya nəzərdə tutulub.

Deputat mandatı alan Kaxa Kaladze yenidən energetika naziri və vitse-baş nazir postuna qayıda bilər. Əvvəllər hakimiyyətdə təmsil olunmayan Zurab Alavidze infrastruktur naziri təyin edilib. Deputat Viktor Dolidze Avropa İnteqrasiya məsələləri üzrə dövlət naziri, David Bakradze isə ABŞ səfiri təyin edilib.

Xarici işlər, ədliyyə, daxili işlər, müdafiə, səhiyyə nazirləri olduğu kimi qalıb.

Konstitusiyaya əsasən Gürcüstan parlamenti yeni hökuməti təsdiqləməlidir.

Hikmət
Ölkə.az