İŞİD-dən daha bir qətliam

İraqda İŞİD-in törətdiyi qətliamın yeni təfərrüatları açıqlanıb.

“Reuters” agentliyinin xəbərində deyilir ki, İraq sünnilərinə məxsus kütləvi məzarlıq aşkar edilib. Məzarlıqdan 150 nəfərin meyiti çıxarılıb. İraq hökumətinə bağlı rəsmilər bildiriblər ki, bu sünnilər İŞİD-ə qarışa vurşduqlarına görə, terrorçu qrup tərəfindən cəzalandırılıb.

Agentlik bildirir ki, İŞİD döyüşçüləri Ramadi şəhəri yaxınlığındakı kəndə gecə ikən hücum ediblər. Şahidlər bildiriblər ki, onlar Albu Nimr tayfasından 70 nəfərin meyitini Hit şəhəri yaxınlığında aşkar ediblər. Həmin şəhər sünnilərin cəm halında yaşadığı Anbar vilayətinə daxildir.

Hit şəhərində tapılan meyitlərin əsasən polislərə və İŞİD-ə qarşı döyüşən sünnilərə aid olduğu söylənilir. İŞİD-ə qarşı vuruşan sünnilərə isə Sahva (yuxudan oyanmışlar) deyilir.

“Bu gün səhər erkən biz bu meyitləri tapdıq. Bizə dedilər ki, İŞİD onlara qarşı çıxan sünnilərdən belə intiqam alıb”.

Albu Nimr tayfasının şeyxi bildirib ki, müxtəlif yerlərdə tapılan meyitlərin sayı 300-dən artıqdır. Əsasən 18-55 yaşında olan kişilərdir. Onlar bu həftə İŞİD tərəfindən öldürülüb.

Agentlik qeyd edir ki, İraqın şiə hökuməti yerli sünni tayfaların İŞİD-ə qarşı döyüşlərdə ordu ilə bir yerdə olmasını istəyir. İŞİD isə öz növbəsində ona qarşı çıxanların başını kəsməklə və ya onları asmaqla sünniləri bu kimi addımlardan çəkinməyə vadar etmək istəyir. (anspress)

Ölkə.Az