Peşmərgə Kobaniyə axışır

Peşmərgənin 10 nəfərlik bir qrupu Ərbildən Türkiyəyə, oradan da Kobaniyə keçib.

Gələn Peşmərgə qrupu yerli kürd birləşmələri tərəfindən sevinclə qarşılanıb. Kobaniyə girən 10 nəfərlik qrup xidmət edəcəyi yeri, ağır silahları harada və necə istifadə edəcəyi haqqında danışıqlar aparmaq üçün PKK əlaqəli Demokratik Birlik Partiyası (PYD) ilə görüşüb.

Peşmərgə Nazirliyinin mətbuat katibi Osman Rişeyi bildirib ki, ilk qrup peşmərgələrin Kobanidə xidmət edəcəyi yeri təsbit edəcək. Daha sonra Peşmərgə qüvvələri qrup şəklində Suriya tərəfə keçəcəklər. Onun sözlərinə görə, bütün Peşmərgə qüvvələri Suriya tərəfə keçib qurtarandan sonra Kobanidəki müharibə cəbhəsinə gedəcəklər.

Doğan xəbər agentliyinin məlumatlarına əsasən, Peşmərgələr burada silahların istifadə edilməsinə aid təlimlər keçəcəklər. Onlar müharibədə birbaşa iştirak etməyəcəklər. Sadəcə koordinatları verilən İŞİD mövqelərini ağır silahlarla vuracaqlar.

Ölkə.Az