Ermənistan XİN: "Balans silahla deyil, mənəvi-döyüş ruhu ilə qazanılır"

"Rusiya tərəfindən Azərbaycana silahın satışı məsələsi erməni-Rusiya danışıqlarında masa üzərində qalır."

Bunu Ermənistanın xarici işlər nazirinin müavini Şavarş Koçaryan parlamentdə jurnalistlərə bildirib.

O deyib ki, bu məsələyə geniş şəkildə baxmaq lazımdır. Nəzərə almaq lazımdır ki, biz də hərbi balansı saxlamaq üçün silah alırıq. Lakin balans yalnız silahla əldə edilmir. Ötən əsrin 90-cı illərinin əvvəllərində silahlandırma üzrə Azərbaycanın üstünlüyü müqayisəedilməz idi.

Onun sözlərinə görə, Sovet İttifaqının dağılmasından sonra Azərbaycana 50-dən çox hərbi vertolyot qalıb. Biz isə heç nə almadıq. Biz hava texnikasını müharibə illərində aldıq. Zirehli avtomobillər, tanklar üzrə biz geri qalırdıq, amma nəticə hamıya məlumdur: "Balans silahla deyil, mənəvi-döyüş ruhu ilə qazanılır."

Təbbi ki, bu açıqlaması ilə XİN rəsmisi Moskva-Bakı yaxınlaşmasından əndişələndiklərini büruzə verib. Bu gün Rusiyanın Ermənistandan nisbətən üz döndərməsi onlar üçün narahatlıq yaradır və müxtəlif saxta fikirlərlə təsəlli tapırlar. O, guya erməni ordusunda mənəvi döyüş ruhunun yüksək olduğunu deməklə, ölkədə hər şeyin rəvan getdiyini göstərməyə çalışır. Amma, ermənilər də, ruslar da, bütün dünya da bilir ki, indiki vəziyyətdə Azərbaycan ordusu Ermənistan ordusundan qat-qat güclüdür və istənilən vaxt torpaqlarını azad etməyə qadirdir. Sadəcə zamana ehtiyac duyulur./Anspress/

Ölkə.Az