Ölü \"gəlin\" alverçiləri yaxalandı

Çində ölü "gəlin" alveri ilə məşğul olan şəxslər saxlanılıb

Ölkə.Az South China Morning Post qəzetinə istinadən xəbər verir ki, Çin polisi qəbiristanlıqdan meyit oğurlamaqda təqsirli bilinən 11 nəfəri həbs edib.

Hüquq-mühafizə orqanlarının əməkdaşları iddia edirlər ki, bu şəxslər meyitləri oğurlayaraq "in hun" - ölülərin nikahı adlı qədim mərasimin həyata keçirilməsi üçün "qara" bazarda satıblar.

Tükürpədici hadisə Çinin şərq vilayətlərindən birində, Şandunda baş verib. Polisin əldə etdiyi informasiyay görə, saxlanılanlar dünyasını dəyişmiş qadının meyitini qəbirdən çıxararaq 18 min yuan (təqribən 3000 dollar) qiymətinə dəllala satıblar.

Dəllal isə qalıqları "qara" bazarda dünyasını dəyişmiş "bəy"-in yaxınlarına 38 min yuana satıb. Əsas təqsirkar hesab edilən Vad adlı şəxs bildirib ki, ən bahalı meyitlər təzə meyitlərdir və onları daha yüksək qiymətə satmaq olur.

Saxlanılanlar barəsində cinayət işi açılıb. Meyit oğurluğuna görə Çində 3 il həbs cəzası almaq mümkündür.

Çində ölülərin evləndirilməsi adəti 2 min ildən artıq mövcuddur. Bu mərasimin kökü hələ Xan sülaləsinin hakimiyyət dövrünə ( b.e. əvvəl 206 - b.e. 220-cı illər ) qədər gedib çıxır.

Adətin əsas mahiyyəti ondan ibarətdir ki, evlənməmiş dünyasını dəyişən kişinin yeraltı dünyada tək qalmaması üçün onun qohumları yeni "gəlin" tapırlar.

Rəşid Mustafazadə

Ölkə.Az