Siyasi lider baş verənlərə terror deyə bilmədi
Türkiyədə PKK-çı kürdlərin dəstəklidiyi Xalqların Demokratiya Partiyasının (HDP) həbsdə olan həmsədri Səlahəddin Demirtaş ötən həftə sonu ölkədə çox sayda insanın ölməsi və yaralanması ilə nəticələnən hadisəni terror kimi qiymətləndirməyib.
Ölkə.Az xəbər verir ki, Demirtaş baş vermiş terror hadisəsi barədə həbsxanadan mesaj yollayıb. Çıxışlarında PKK-ya söykəndiklərini bəyan edən və terrorçuların cənazə mərasimlərində hər zaman iştirak edən kürd lider mesajında terror sözünü işlətməyib, tərəfdarlarını güya sülhə və həmrəyliyə səsləyib. "Bütün ictimaiyyəti, xalqımızı, zorakılıq əleyhdarlığında, sülh, qardaşlıq, demokratiya və azadlıq duyğuları ətrafında ümidlə bərabərliyə dəvət edirəm. Şərtlərimiz nə qədər çətin olursa-olsun, müqəddəs qəbul etdiyimiz sülhü müdafiə etməkdən imtina etməməli, ümidlərimizi itirməməliyik. Bu sıxıntılı dövrü həmrəyliklə başa vuraraq ölkəni düzlüyə çıxarmalıyıq." deyə Demirtaş bildirib.
Xatırladaq ki, dekabrın 10-da Türkiyənin İstanbul şəhərində 44 nəfərin ölümü, 158 nəfərin müxtəlif dərəcəli bədən xəsarəti alması ilə nəticələnən terror hadisəsi baş verib.
Ziya Səccad
