Seperatçıların seçkiləri başladı

Ukraynanın Rusiyayönümlü üsyançıların nəzarəti altında olan cənub-şərq əyalətlərində seçki artıq başlayıb. 

Parlament seçkiləri Donetsk Xalq Respublikasında və Luqansk Xalq Respublikasında keçirilir. Rusiya rəhbərliyi bu seçkilərin nəticələrini tanıyacağını bəyan edib. 

Rəsmi Kiyev və Qərb ölkələri isə seçkinin Minsk razılaşmalarını pozduğunu bildirərək, onu qeyri-legitim adlandırıb. Donestk və Luqansk qondarma respublikalarının rəhbərlikləri müstəqilliklərini elan etdikdən bəri Ukrayna qanunlarının onlara heç bir aidiyyatı olmadığını bəyan edirlər. Bəyanata görə, məhz bu səbəbdən onlar ötən həftə Ukraynada baş tutan parlament seçkilərində iştirak etməkdən imtina ediblər və noyabrın 2-də öz seçkilərini keçirirlər. 

Donetsk və Luqanskda bu gün qondarma respublikaların başçıları və "milli şura"ların deputatları seçiləcək. Donetsk Xalq Respublikasının başçısı vəzifəsi uğrunda hazırkı baş nazir Aleksandr Zaxarçenko da daxil olmaqla, 3 namizəd mübarizə aparır. 

"Ədalət, xoşbəxtlik, sülh və rifah naminə səs verdim. Əgər Ukrayna bizi tanısa və itirilmiş torpaqlarımızı döyüşsüz qaytarsa, biz onlarla normal iqtisadi əlaqələri bərpa edəcəyik və bərabər iqtisadi müttəfiqlər kimi yaşayacağıq", - deyə Aleksandr Zaxarçenko bildirib.

Luqansk Xalq Respublikasının başçısı olmaq üçün isə "respublika"nın hazırkı başçısı İqor Plotnitski də daxil olmaqla 4 nəfər namizədliyini irəli sürüb. 

Səsvermə prosesi üçün 3 milyon seçki bülleteni çap edilib.

Ukraynanın cənub-şərqində seçkilər sentyabrda atəşkəs elan edildikdən bəri silahlı qarşıdurmanın yenidən baş qaldırması fonunda keçirilir. Son 2 gün ərzində döyüşlər zamanı 7 ukraynalı əsgər ölüb, 10 nəfər isə yaralanıb. (anspress)

ÖLkə.Az