Trampdan avtomobil istehsalçılarına sərt reaksiya

ABŞ-ın yeni seçilmiş prezidenti Donald Tramp "General Motors" şirkətinə sərt reaksiya verib.

Ölkə.Az xəbər verir ki, Tramp Tvitter səhifəsində ABŞ-ın ən böyük avtomobil istehsalçısı olan "General Motors" şirkətinə "ya istehsalı ABŞ-da reallaşdır, ya da sərhəd vergisi ödə" yazıb.

Bu tvitdən 3 saat sonra ölkənin ikinci ən böyük istehsalçısı "Ford" şirkəti Meksikadakı 1.6 milyard dollarlıq sərmayə planını ləğv edib. Şirkət bunun yerinə ABŞ-ın Miçiqan əyalətində 700 milyon dollarlıq yeni zavod inşa edəcəyini bildirib.

Məsələ ilə bağlı mətbuat konfransı təşkil edən şirkətin baş direktoru Mark Fields deyib: "700 nəfərlik iş yeri açılacaq. Yeni prezident Tramp və yeni Konqresin vəd etdiyi iqtisadi inkişaf siyasəti bizi bu məsələdə cəsarətləndirib".

Tramp isə tvitində Meksikada istehsal etdiyi avtomobilləri ölkəyə vergi ödəmədən gətirən "General Motors" şirkətini hədəf almışdı.

Hikmət
Ölkə.Az