Binəli Yıldırım Trampı sərt tənqid etdi

Ölkə.Az xəbər verir ki, Binəli Yıldırım İngiltərənin baş naziri Tereza Meylə görüş zamanı bu məsələyə toxunub. Baş nazirin sözlərinə görə, sərhəddə divar tikməklə problemləri həll etmək olmaz.

“Nəhəng divar tikəcəksiniz. Həmin divarlar da illər keçdikcə yığılmış problemlərin ağırlığına tab gətirməyəcək və çökəcək. Necə ki, illərlə öyündükləri Berlin divarı çökdü. Berlin divarı kimi bir gün sizin də tikmək istədiyiniz divar yerlə bir olacaq. Dəyişiklikləri və gündəmi tutmaq lazımdır. Baş verənləri dərk etmək və problemlərin həlli yollarını axtarmaq lazımdır. Beynəlxalq problemləri “xalçanın altını süpürməklə” həll etmək olmaz. Problemlər böyüməmiş onları həll etmək lazımdır”, - deyə Binəli Yıldırım bildirib.

Xatırladaq ki, Donald Tramp yanvarın 25-də Meksika ilə sərhəddə divarın ucaldılmasına dair fərman imzalayıb. ABŞ-la Meksika sərhəddində divarın tikintisi 12-15 mlrd. dollara başa gələcək. Tramp istəyir ki, tikinti zamanı çəkilən xərclər Meksika dövlətinin büdcəsi hesabına ödənilsin. Meksika prezidenti Enrike Penya Nyeto isə bildirib ki, divaırn tikintisinə çəkilən xərclərə Meksika dövləti pul ayırmayacaq. 

Tramp isə həmin vəsaiti çıxartmaq üçün Meksikadan ABŞ-a gələn mallara 20 faiz əlavə vergi qoyacaq. Bu qərar həm də Amerika vətəndaşlarını da narahat edib. Çünki Meksikadan Amerika mal gətirən həmin insanlara da problem yaranacaq.

Ziya Səccad
Ölkə.az