ABŞ BMT-dən nə tələb edir?

Amerika Sahibkarlıq İnstitutunda “Münaqişə zamanı sülhyaratma sahəsində islahatlar keçirilməsi – Amerika Birləşmiş Ştatlarının Birləşmiş Millətlər Təşkilatındakı nümayəndəsi Samanta Pauer ilə müzakirələr” adlı təqdimat keçirilib.

Samanta Pauer auditoriya qarşısında çıxış edərək ABŞ-ın iştirak etdiyi BMT-nin sülhyaratma əməliyyatlarından danışıb. O qeyd edib ki, Amerikanın 130 min hərbi qulluqçudan ibarət sülhməramlı qüvvələri 16 münaqişə zonasındadır. Buraya uzunmüddətli missiyalar, o cümlədən BMT-nin Bosniya və Sina yarımadasındakı missiyası da daxildir.

S.Pauer qeyd edib ki, keçən əsrin ortalarında aparılmış sülhyaratma əməliyyatları ilə müqayisədə indi bu qüvvələr daha çox funksiyanı - hərbi əməliyyatların qarşısının alınması, hərbi qruplaşmaların tərksilah edilməsi, dünyanın Cənubi Sudan, Konqo Demokratik Respublikası və Liberiya kimi daha “qaynar” münaqişə regionlarında humanitar dəstələrin təhlükəsizliyinin və sülh rejiminin təmin edilməsi kimi funksiyaları həyata keçirirlər. Öhdəliklərin artması dünya birliyinin əlavə resurslarını cəlb etmək üçün islahatlar keçirilməsini tələb edir. ABŞ-ın BMT-dəki nümayəndəsi BMT-nin sülhyaratma fəaliyyətində ABŞ-ın rolunu qeyd edərək digər ölkələri də BMT-nin missiyalarının həyata keçirilməsi üçün maliyyə yardımını və sülhməramlı kontingentin sayını artırmağa çağırıb.

O qeyd edib ki, bəzi ölkələr, o cümlədən Kolumbiya, Yaponiya və İndoneziya artıq BMT-nin sülhməramlı qüvvələrindəki kontingetini artırmağa imkan verən qanun layihələri qəbul edirlər. Xatırladırıq ki, Samanta Pauer 2013-cü ilin avqustunda ABŞ-ın BMT-dəki nümayəndəsi vəzifəsinə təyin olunub. (AzərTAc)

Ölkə.Az