Kerri razılaşmanı alqışladı

Amerika Birləşmiş Ştatlarının dövlət katibi Con Kerri Yaponiya ilə Çin arasında noyabrın 7-də əldə edilmiş və ikitərəfli münasibətlərin yaxşılaşmasına yönəlmiş razılaşmanı alqışladığını bildirib. 

C.Kerri bu barədə Yaponiyanın xarici işlər naziri Fumio Kişida ilə ötən cümə günü baş tutan görüşündə danışıb. F.Kişida və C.Kerri Asiya-Sakit okean Əməkdaşlıq Təşkilatının forumunda nazirlər səviyyəsində keçirilən konfrans zamanı görüşüblər. Danışıqlar zamanı F.Kişida C.Kerrini Yaponiya və Çin arasında əldə olunmuş razılaşma barədə məlumatlandırıb.

Razılaşmada əsas diqqət iki ölkə arasında strateji əməkdaşlığın hər iki tərəf üçün qarşılıqlı faydalı olmasına yönəldilib. F.Kişida həmçinin C.Kerriyə iki ölkə liderlərinin görüşünün təşkili də daxil olmaqla Çin ilə münasibətlərin yaxşılaşdırılması istiqamətində atılan addımlardan danışıb. Öz növbəsində C.Kerri bu addımları tamamilə konstruktiv və perspektivli adlandırıb. (AzərTAc)

Ölkə.Az