Bəşər Əsəd sabah Türkiyəni və Ərdoğanı tərifləyə bilər

Bu barədə politoloq İlqar Altay Ölkə.Az-a açıqlamasında bildirib. Onun sözlərinə görə, Obama “Ərəb baharı”nı yaratdı, amma sonra onu başa çatdıra bilmədi.

“Bu amillər də Amerikanın özünə qarşı yönəldi. Tramp isə fikirlərini qətiyyətlə bildirir və dediyinə də əməl edir. Siyasətini praktika formasında aparır. İran da bu səbəbdən qorxuya düşüb. Tramp hansı ölkələrdən terror təhlükəsi gələ bilər, onların siyahısını hazırlayıb. Həmin 7 ölkə vətəndaşları tərəfindən terror təhlükəsi ABŞ-a gələ bilər. Tramp da haqlı olaraq, onların ölkəyə girişini qadağan edib. Düşünürəm ki, bu doğru addımdır. Bəşər Əsədin bu işi dəstəkləməsinə gəlincə, bu bir qədər gözlənilməz oldu”, - deyə siyasətçi bildirib. 

İlqar Altay deyir ki, Türkiyənin Suriyada müxalif qüvvələri dəstəkləməsində, hardasa Rusiyanın mövqeyində dəyişiklik etməyə nail olmasından sonra Əsəd çox zəiflədi:

“O, çaşqınlıq içindədir. Əsəd harada güc dövləti var, özünü ora yönəltmək istəyir. Bu qorxu içində olan liderin hərəkətləridir. Əsəd görür ki, Tramp qətiyyətlidir, sona qədər mübarizə apara bilir, bu səbəbdən də, çıxış yolunu onunla münasibətləri düzəltməkdə görür. Düşünürəm ki, Əsədin belə çıxışlarını ciddi kimi qəbul etmək lazım deyil. Ötən gün Rusiyanı və Putini tərifləyirdi. Əsəd sabah da Türkiyəni və Ərdoğanı tərifləyəcək. Hətta mövqeyini də müxalifətə verəcək. Türkiyə neçə ildir Suriyada sayılmayan müxalifəti Rusiya və İranla bir stol arxasında oturacaq səviyyədə söz sahibi etdi”.

Qeyd edək ki, Suriya prezidenti Bəşər Əsəd ABŞ prezidenti Trampın Suriya da daxil olmaqla 7 müsəlman ölkəsinin vətəndaşlarının Birləşmiş Ştatlara səfərini qadağan edən qanun layihəsini şərh edib. Bu qadağanı müdafiə edən Əsəd bildirib ki, qanun Suriya xalqının əleyhinə deyil. Bəşər Əsəd bu qanunun Suriya xalqını yox, terrorçuları hədəflədiyini bildirib. Bundan bir neçə gün əvvəl isə Əsəd Rusiyanı və şəxsən Putini tərifləmişdi.

Ziya Səccad
Ölkə.Az