Sergey Lavrov: “Rusiya ucuz siyasi şoulara qoşulmaq istəmir”

Ölkə.Az xəbər verir ki, görüşdən sonra keçirilən mətbuat konfransında Sergey Lavrov jurnalistlərə bildirib ki, görüş zamanı ABŞ-ın Rusiyaya qarşı tətbiq etdiyi sanksiyalar müzakirə obyekti olmayıb.

“Sanksiyalarla bağlı müzakirələr aparılmadı. Düşünürəm ki, bu mövzu heç müzakirə olunmamalıdır. Çünki Rusiyaya qarşı tətbiq edilən sanksiyalar həm də ABŞ üçün zərərlidir. Sanksiya tətbiq edənlər, bunun özləri nə dərəcədə səmərəli olduğunu, bunun ölkələr arasında  normal ünsiyyətə nə dərəcədə cavab verdiyini qiymətləndirməlidirlər”, - deyə Sergey Lavrov  bildirib.

Rusiyalı nazirin sözlərinə görə, məsələ yetərincə siyasiləşdirilib. Bu səbəbdən də, Rusiya ucuz siyasi şoulara qoşulmaq istəmir.
Qeyd edək ki, fevralın 16-da ABŞ-ın yeni dövlət katibi Reks Tillerson Rusiya xarici işlər naziri Sergey Lavrovla görüşüb. Görüş Almaniyanın Bonn şəhərində baş tutub. Görüş barədə açıqlama verən Reks Tillerson danışığın uğurlu keçdiyini deyib. Onun sözlərinə görə, danışıqlar zamanı bir neçə mübahisəli məsələyə aydınlıq gətirilib.

“Biz Rusiya ilə düşmən deyilik. Hər zaman da əməkdaşlığa hazırıq. Lakin bu münasibətlər Amerika xalqına fayda gətirməlidir. Bu baxımdan, Amerika dövləti və xalqı üçün faydalı olan bütün məsələlərdə Rusiya ilə qarşılıqlı əlaqə qura bilərik. Biz həmişə bu məsələni diqqətdə saxlamışıq”, - deyə Reks Tillerson bildirib.

Tillerson həmçinin qeyd edib ki, iki ölkə arasında ziddiyyət təşkil edən məsələlərdə ABŞ gələcəkdə də öz mövqeyindən dönməyəcək.

Ziya Səccad
Ölkə.Az