ABŞ-ın İraq “məhəbbəti” nədən yaranıb?

"Heç kəsin neftini əlindən almaq üçün burda deyilik", - deyə Mattis bildirib.

Bu fikirlər beynəlxalq siyasətdə birmənalı qarşılanmayıb. Bəzi siyasətçilər amerikalı naziri qeyri-səmimilikdə ittiham edirlər. Məsələ ilə əlaqədar politoloq Elxan Şahinoğlu isə Ölkə.Az-a açıqlamasında bildirib ki, Amerikanın İraqda olmasının səbəblərindən biri neft olsa belə, onların əsas məqsədi dünyada terrorçuların kökünü kəsməkdir. Onun sözlərinə görə, Amerikanın yeni rəhbərliyi bu məsələni ən birinci vəzifə olaraq qarşılarına qoyublar.

“ABŞ ordusunun strukturları İraqda var və İraq ordusunun formalaşmasında Amerikanın böyük rolu olub. Səddam Hüseyn hakimiyyəti devriləndən sonra yeni İraq ordusunun yaranmasında bilavasitə amerikalı hərbi strukturlar iştirak edib. Hazırda Mosul şəhərinin terrorçulardan azad olunmasında həmin hərbçilər iştirak edirlər. Məsələnin digər tərəfi ondan ibarətdir ki, Donald Tramp prezident seçildikdən sonra Amerika beynəlxalq terrorçulara qarşı mübarizəni daha da gücləndirmək istəyir. Təsadüfi deyil ki, Amerika və Rusiya baş qərargah rəisləri görüşdü. Sonra isə onlar türkiyədə görüş təşkil etdilər. Məsələnin məğzi ondan ibarətdir ki, Amerika Silahlı Qüvvələri Suriyaya hərbi müdaxilə etmək istəyirlər. Rakka şəhərinə hücumda Türkiyə və Rusiya ilə əməkdaşlıq etmək istəyirlər. Üstəlik İraqdakı fəaliyyətlərini də genişləndirirlər. Səfərlərin belə artması Suriya və İraqada hərbi iştirakını genişdirmək istəyilə bağlıdır. Amerika qarşısına beynəlxalq terroru məhv etməyi hədəf qoyub. İraqda, Suriyada terorçular olduqda, bu Avropa, Amerika, Türkiyə, Rusiya və başqa ölkələr üçün böyük təhlükədir. Amerika bu təhlükənin qarşısını almaq istəyir”, - deyə E.Şahinoğlu bildirib.

Siyasətçi deyir ki, bununla yanaşı Amerikanın İraq neftinə olan marağı da az deyil:

“İraq böyük enerji resurslarına malik ərazidir. Orada böyük neft ehtiyatları var. Amerika şirkətləri həmin neft rezervlərinə maraq göstərirlər. Aydındır ki, İraq terrorçulardan təmizləndikdən sonra Amerikanın böyük şirkətləri həmin neftin işlənməsində iddialı olacaqlar. Amma bu o demək deyil ki, məhz neftə görə Amerika İraqa maraq göstərir”. 

Ziya Səccad
Ölkə.AZ