NATO-nun yeni problemi

"Ölkə.Az" xəbər verir ki, NATO-nun bir həftə əvvəl yeni problemi üzə çıxıb. Bu isə Muəmmar Qəddafinin qızı Ayşə Qəddafidir. 4 illik sükutdan sonra Ayşə məktubla liviyalılara müraciət edərək Qərbin yeni işğalına qarşı mübarizə aparmağa səsləyib və özünü Qəddafinin varisi, "Liviyanın anası" elan edib. Liviyanın Beni-Valid şəhərinin varfalla qəbiləsi Ayşəyə sadiqliyini nümayiş etdirdi və onu Cəmahiriyyənin tərəfdarı olduğunu elan etdi. Britaniya ordusu cavab olaraq Muəmmar Qəddafinin qətlinə dair yeni kadrlar yayımladı. Məqsəd Ayşənin kəskin reaksiyasına səbəb olmaq idi. NATO isə Hollandiyada Liviyadakı vəziyyətlə bağlı təcili toplantı keçirdi.

Ayşə Qəddafinin övladları arasında liviyalılara təsir edə biləcək və Qərbə real təhlükə yarada biləcək yeganə varisidir. Sorbon universitetinin məzunu olan Ayşə Liviya sərhədlərindən kənarda gizli hökumətin qurulduğunu bəyan etmişdi. Bu bəyanatdan sonra Qərb Ayşəni atasının taleyini yaşayacağı ilə hədələdi. Qeyd edək ki, Ayşə atasının ölümündən başqa, iki övladının və ərinin də ölümünə görə qisas almağı planlaşdırır.

Ayşə Qəddafinin 39 yaşı var. Liviyadakı çevrilişdən əvvəl qız olsa da, onu ölkədə atasının varisi sayırdılar. Atasının sevimlisi olan Ayşə uşaq yaşlarından onun ideyalarına pərəstiş edir, yeni Liviya erası ənənələrində tərbiyə alırdı. Bu tərbiyəyə əsasən, bütün dünyanı bacarmasa da, Afrikanı xilas etməli idi.

Liviyada Qəddafinin öldürülməsinə qədər Ayşə Qərb mətbuatı tərəfindən "Afrikalı Klaudio Şiffer" adlandırılırdı. Buna səbəb həm də onun Qərb dəbinə uyğun geyinməsi idi. Amma 2011-ci ildə Ayşə qəflətən geyim üslubunu dəyişərək hicaba keçdi.

Qəddafinin qızı olmaq statusu Ayşəni onun siyasətinin və hətta şəxsi həyatının da davamçısı olmağa vadar etdi. Qəddafi yeganə qızını xalası oğlu polkovnik Əhməd əl-Qəddafi əl-Kasxiyə ərə vermişdi. Bununla da məqsədi qan qohumluğunu möhkəmləndirmək idi. Əl-Qəddafi qəbiləsi Məhəmməd Peyğəmbərin dövründə İraqdan Liviyaya köçüb. Ayşə də Səddam Hüseynin müdafiə qrupunda hüquqşünas kimi iştirak edib. Sonradan Ayşə Qəddafi Afrikada AİDS və aclıqla mübarizədə xoşməramlı səfir kimi iştirak etdi. 2011-ci ilin avqust ayında paytaxt Tripoli üsyançıların əlinə keçdikdən sonra Muəmmar qızına Liviyada qalmağa icazə vermədi. Qəddafinin rezidensiyası işğal edildikdən 5 gün sonra Muəmmar arvadı Safiyəni və hamilə qızını Muhəmməd və Hannibal adlı iki oğlunun müşayiəti ilə Əlcəzairə göndərdi. Bundan üç gün sonra Ayşənin qız övladı dünyaya gəldi. 21 oktyabrda Qəddafinin ölümü qızın həyat gücünü əlindən aldı. Amma xəstəxanadan ayrıldıqdan sonra Ayşə öz müharibəsinə başladı.

Əlcəzair hökumətinin qadağalarına baxmayaraq, Ayşə iki dəfə videomüraciətlə liviyalıları Qəddafinin qisasını almağa səslədi. 2012-ci ilin oktyabr ayında isə Omana köçmək məcburiyyətində qaldı. Bu müddət ərzində Ayşə Qəddafi artıq BMT-nin xoşməramlı səfiri statusundan məhrum olmuşdu. Siyasi fəaliyyətinə görə İnterpol tərəfindən təhlükədə idi.

Ayşə Qəddafi inanır ki, Muəmmar Qəddafi Liviyada yox, liviyalıların qəlbindədir.

Hikmət
Ölkə.Az