Tacikistanda İŞİD-çilər saxlanıldı

Onlar Tacikistanın şimalında bir sıra terror aktları həyata keçirməyə hazırlaşıblar.

Ölkə.Az rusiya mətbuatına istinadən xəbər verir ki, Tacikistanın şimalında ekstremist "Özbəkistanın islam hərəkatı" təşkilatının üzvləri saxlanılıb.

""Özbəkistanın islam hərəkatı" adlı terror təşkilatının üzvlərinin bir qrupu İsfara şəhərində saxlanılıb. Onlar son 3 il ərzində xaricdə terrorçuların hazırlanması ilə məşğul olan düşərgələrdə təlim keçiblər",-deyə, Tacikistanın Daxili işlər nazirliyindən bildiriblər.

Bildirilir ki, saxlanılan şəxslər Tacikistanın şimalında yerləşən Soqdiya vilayətinin ərazisində bir sıra terror aktları həyata keçirməyə hazırlaşıblar. Axtarış zamanı onların üzərindən kamikadzelərə məxsus avadanlıqlar, partlayıcı maddələr aşkar edilib.

Xatırladaq ki, bu ilin oktyabr ayının əvvəlində "Özbəkistanın islam hərəkatı"-nın başçısı Usmon Qozi rəhbərlik etdiyi təşkilatın İŞİD-ə qoşulduğunu bəyan etmişdi.

Rəşid Mustafazadə

Ölkə.Az