Tramp Suriyaya hücum etməyin səbəbini açıqlayıb

"Ölkə.Az" xəbər verir ki, Tramp bu barədə Konqres üzvlərinə bildiriş məktubu göndərib.   Məktubun mətni tam olaraq Trampın zərbədən sonra səsləndirdiyi bəyanatla eynidir.

Tramp Bəşər Əsəd rejimini aprelin 4-də İdlib əyalətində kimyəvi silahdan istifadə etməkdə ittiham edib. Tramp, raket zərbəsinin kimyəvi silahdan istifadənin təkrarlanmasının qarşısını almaq məqsədilə endirildiyini deyib.

Qeyd edək ki, aprelin 7-ə gecə ABŞ-ın Aralıq dənizindəki hərbi gəmilərindən Əsəd ordusuna aid Şayrat aviabazasına 59 raket buraxılıb. Nəticədə aviabazanın uçuş-enmə zolağı, təyyarələrin dayanacağı və yanacaqdoldurma kompleksləri vurulub. Homs qubernatoru zərbə nəticəsində 5 hərbçi və 2 mülki şəxsin öldüyünü bildirib.

Xatırladaq ki, aprelin 4-də Bəşər Əsəd rejiminə aid hərbi təyyarələrin İdlib şəhərinə zərbələr endirməsindən sonra kimyəvi zəhərlənmə nəticəsində çoxlu sayda insan ölüb və yaralanıb.

Ziya Səccad
Ölkə.Az