ABŞ Şimali Koreya ilə müharibəyə başlasa, nə baş verə bilər?

Şimali Koreya rəhbərliyi ABŞ-a sərt cavab verib. Xəbərdarlıqda rəsmi Pxenyan istənilən müharibəyə cavab verməyə hazır olduğunu qeyd edib. Dünya siyasətçilərinin diqqətini cəlb edən məsələdə vəziyyətin qəlizləşməsi regionda böyük problemlərə səbəb olub.

Azərbaycanlı siyasətçilər isə düşünürlər ki, bu problemin tam həll olunmasında Amerika ilə Rusiyanın bir ara gəlməsi ən ideal vəziyyət olardı. Politoloq Mübariz Əhmədoğlu Ölkə.Az-a açıqlamasında bildirib ki, Şimali Koreya məsələsi ABŞ ilə Rusiyanı hədsiz dərəcədə möhkəm bağlayan yeganə məsələ idi. Onun sözlərinə görə, indi yaranmış vəziyyət Amerikanın ziyanına işləyir.

“Təəssüf ki, ABŞ bu yaranmış vəziyyətdən istifadə etmədi. Şimali Koreya ABŞ üçün böyük təhlükədir. Şimali Koreya ətrafında gedən proseslər də Rusiya üçün təhlükə yaradır. Bu məsələ ABŞ ilə Rusiyanı birləşdirə bilərdi. Nə Obama hökuməti bundan istifadə etmədi. Nə də Tramp hakimiyyəti bu mövzuda Rusiyaya güvənmədi. Çin artıq vəziyyəti başa düşüb; Tramp Çinin sədri Sİ Tsizipinlə kabinetdə olarkən Suriya hücumunun əmrini verib. ABŞ Şimali Koreya məsələsində də öz mövqeyini çətinləşdirib. Son günlər ABŞ-ın Şimali Koreyaya təhdidləri də o qədər effekt vermir. Əksinə Şimali Koreya vəziyyəti bir az da gərginləşdirir. Düşünürəm ki, Amerika bu məsələdə Çinə də arxayındır. Amerika Şimai Koreyada müharibə etsə, özü üçün daha gərgin vəziyyət yarada bilər. Ola bilər ki, ABŞ Şimali Koreyaya bir neçə raket zərbəsi endirsin. İndi onların obyektlərini vura biləcəklər, ya yox, bu sual altındadır”.

Ziya Səccad
Ölkə.Az