Poroşenko seçkiöncəsi vədini yerinə yetirir

Poroşenko "Roşen" şirkətini satır.

Ölkə.Az rusiya mətbuatına istinadən xəbər verir ki, Ukraynanın prezidenti Pyotr Poroşenko məşhur "Bild" alman nəşrinə müsahibəsində bildirib ki, yaxın zamanda ona məxsus olan "Roshen" şirkətinin satacaq.

Onun sözlərinə görə, şirkəti iri investisiya banklarından biri alacaq və bu barədə müzakirələr artıq son mərhələdədir. Bununla Poroşenko prezident seçkisindən öncə verdiyi vədi yerinə yetirmiş olur.

Xatırladaq ki, Poroşenko bu ilin may ayının sonunda "Roşen"qənnadı fabrikinin əsas aktivlərinin satılması ilə bağlı tapşırıq verdiyini bildirmişdi.

Sahibkarlıq fəaliyyəti ilə məşğul olan Poroşenko şəxsi biznesinə kakao paxlasının satışı ilə başlayaraq 90-cı illərdə bir neçə qənnadı müəssisəsini almışdı. Sonradan bu müəssisələr Ukraynada ən böyük qənnadı istehsalçısına çevrilən “Roşen” qrupunda birləşdilər. Qənnadı sənayesi müəssisəsi Poroşenkoya böyük sərvət və “şokolad kralı” ləqəbini qazandırır. Bəzi mənbələrin fikrincə, şirkətin adını Poroşenkonun həyat yoldaşı seçib. Prezidentin xanımı ərinin soyadından ilk və son hecaları “Po” və “ko” hecalarını çıxarıb və ortada qalan “roşen” adı şirkətə verilib.

Qeyd edək ki, “Roşen” korporasiyasının ixracının təxminən yarısı Rusiyanın payına düşür.

Rəşid Mustafazadə

Ölkə.Az