İran-İraq müharibəsində ölənlərin qalıqları tapıldı

İran-İraq müharibəsində həyatını itirən 529 nəfərin qalıqlarına rast gəlindiyi bildirilib.
 
Ölkə.Az Anadolu agentliyinə istinadən xəbər verir ki, İraq İnsan Haqqları Nazirliyindən verilən yazılı şərhə əsasən, 18 oktyabrdan bu yana Beynəlxalq Qızıl Xaç Təşkilatının nəzarətilə İranla ortaq qazıntı işlərində, sərhəd şəhəri Maysanda 53-ü iranlı 415-i İraqlı olmaqla, 468 adamın qalıqlarının tapıldığı qeyd olunub.

Ölkənin cənubunda Bəsrə şəhərindəki Əl-Fao bölgəsində isə 32-i iraqlı, 29-u İranlı olmaqla, 61 adamın qalıqlarının aşkad edildiyi bildirilib. Bütün işlərin, elmi və texniki üsullarla, qanunlara uyğun olaraq icra edildiyi vurğulanıb.

İran və İraq arasında strateji cəhətdən vacib olan Fars körfəzi və Şəttül-Ərəb çayı üzərində üstünlüyü ələ keçirmək uğrunda 1980-1988-ci illəri əhatə edən müharibə hər iki tərəf üçün uğursuz olmuş, çoxlu sayda insan və maddi itkilərlə nəticələnmişdi.

Müharibədə gedən bir sıra proseslərdən sonra Birləşmiş Millətlər Təşkilatının və İslam Konfransı Təşkilatının vasitəçiliyi ilə 1988-ci il avqustun 20-də bütün döyüş cəbhələrində atəşkəs rejimi elan olundu və bununla müharibə dayandırılmış oldu. 20 avqust tarixində imzalanmış atəşkəs 25 avqustda qüvvəyə minmişdi. Maraqlısı odur ki, tərəflərdən heç biri özünü məğlub hesab etmədi.

Rəşid Mustafazadə

Ölkə.Az