Rusiya ilə Ukraynanın “Eurovision” qalmaqalı yeniləndi

“Ölkə.Az” xəbər verir ki, bu dəfə rusiyalı fotomüxbir Ramil Sidikova Ukraynaya buraxılmayıb. O, “Eurovision” Mahnı Müsabiqəsində iştirak üçün qeydiyyatdan keçsə də, onu Ukrayna sərhəddində saxlayıblar.

Onun çalışdığı qurumdan bildiriblər ki, fotomüxbir qanuni şəkildə qeydiyyatdan keçsə də, onun üçün süni əngəllər yaradıblar:

“Bizim fotoqrafı sərhəddə saxlayıblar. Pasportunu əlindən alıblar. Onu bir saat gözlətdikdən sonra sənədi qaytarıblar və deyiblər ki, adı “Eurovision” yarışında iştirak etmək üçün qeydiyyata düşənlər siyahısında yoxdur. Bu səbəbdən də, onu sərhəddən buraxmayıblar. 

Məsələ ilə bağlı fotomüxbir açıqlamasında deyib ki, Ukraynaya buraxılmamasının səbəbini normal şəkildə izah edən olmayıb.

“Sərhədçilər mənə şablon suallar verdilər. Ukraynaya səfərimin məqsədini soruşdular. Daha sonra səbəbini açıqlamadan geri qaytardılar”, - deyə fotoqraf deyib.

Qeyd edək ki, bu il “Eurovision” Kiyevdə keçiriləcək. Müsabiqənin rəsmi açılığı mayın 7-nə təsadüf edir. Yarışmanın yarım finalları 9-11 mayda keçiriləcək. Yarışmanın finalı isə 13 mayda baş tutacaq. Yarışda 42 ölkənin təmsilçisi iştirak edəcək. Rusiya isə bu il yarışmada iştirak etməyəcək. Belə ki, Ukrayna tərəfi təhlükəsizlik məsələlərini əsas gətirərək Rusiyalı müğənni Yuliya Samoylovaya viza verməyib. “Eurovision” Mahnı müsabiqəsinin təmsilçiləri Rusiyaya təklif ediblər ki, müğənninin ifası canlı olaraq Rusiyada kanalların birində sputnik vasitəsilə yayımlansın. Lakin Rusiyanın 1-ci kanalı bunu düzgün hesab etməyib və Rusiya yarışda iştirak etməkdən imtina edib.

Ziya Səccad
Ölkə.az