BBC Ərdoğanı tənqid etdi

Türkiyədə dünyada getdikcə təklənməyə doğru gedir.

Belə bir iddia ilə BBC çıxış edib.

Məşhur kütləvi informasiya vasitəsində yer alan məqalədə bildirilir ki, Ərdoğanın yeni Türkiyəsi təklənməyə doğru gedir: 

"Türklərin bir sözü var: türkün türkdən başqa dostu yoxdur. Ərdoganın hakimiyyəti dövründə bu ifadə hərfi mənada həqiqət olur. 

Ərdoganın 11 illik baş nazirliyi dövründə Türkiyə Avropa Birliyinə üzv olmaq üçün danışıqlar aparırdı, Türkiyənin müxtəlif ölkələrdə diplomatik təmsilçiliklərinin sayı kəskin artdı. İstanbul dünyanın ən böyük hava limanlarından birinə çevrildi, heç bir hava limanından dünyanın müxtəlif yerlərinə bu qədər uçuş yoxdur.

Ancaq son 2 ayda nəsə dəyişib. Keçən ay BMT Baş Məclisində Təhlükəsizlik Şurasına yeni yerlərə səsvermə olanda Türkiyə əmin idi ki, bu yerə seçiləcək, ancaq İspaniya və Yeni Zelandiyaya uduzdu. Bu Ərdoğan hakimiyyətinə vurulan "sillə" idi". 

Türkiyənin beynəlxalq aləmdə təklənməsi prosesinin ərəb ölkələrində baş verən inqilablardan başlandığını yazan BBC Ərdoğan hökümətinin "düzgün tərəfləri, hədəfləri" seçməməsi ilə əlaqələndirib: 

"Türkiyə "Müsəlman Qardaşlarını" dəstəklədi və Bəşər Əsəd rejiminə münasibətdə birmənalı mövqe tutmadı. Hazırda Türkiyənin Misirdə səfiri yoxdur. Çünki indiki prezident Abdula Fattah al-Sisi hakimiyyətə gələndə Ərdoğan onu "tiran" adlandırmış və qanuni höküməti devirməkdə ittiham etmişdi. Suriya da Türkiyə üçün problemə çevrildi, Türkiyə "cihadçı"ların öz ərazisindən Suriyaya keçməsinə icazə verirdi, bununla da Türkiyənin İraq, İran və Səudiyyə Ərəbistanı ilə münasibətləri korlandı.

Vaxtilə Türkiyənin İsraillə strateji tərəfdaşlığı var idi, Ərdoğan İsrail hakimiyyətinin Qəzzanı bombalamasını Xolokost hadisəsinə bənzədərək öz səfirini Təl-Əvivdən geri çağırdı.

İndi Türkiyənin hətta ABŞ-la münasibətləri korlanıb. Vaşinqton İslam Dövləti yaraqlılarına qarşı koalisiya yaradanda Türkiyə qıraqda dayandı. Türkiyə hətta ABŞ-a özünün "İncirlik" hərbi bazasından istifadə etməyə icazə vermədi. Ərdoğan istəyirdi ki, ABŞ Bəşər Əsədin devrilməsini və Suriya üzərində uçuşlardan azad zona yaradılmasını da təmin etsin. 

Keçən ay Ərdogan ABŞ prezidentinə bildirdi ki, ABŞ kürd yaraqlılarını silahlandırmasın. Ancaq bundan bir neçə saat sonra ABŞ havadan kürdlərə silah, sursat yağdırdı. Bu Türkiyəyə verilən açıq mesaj idi". 

BBC analitiklərinin fikrincə Ərdoğan “yeni Türkiyə” yaratdığını iddia etsə də "Yeni Türkiyə"nin ölkə daxilində və xaricində dostları sürətlə azalır. (anspress)

Ölkə.Az