Rusiyada yaşayış binasında güclü partlayış

Rusiyanın Volqoqrad şəhərində dördmərtəbəli yaşayış binasında partlayış baş verib.

“Ölkə.Az” xəbər verir ki, partlayış zamanı binanın bir bloku tamamilə çöküb, 16 mənzil dağılıb. Yaşayış binasında baş vermiş partlayış nəticəsində 3 nəfər ölüb, 14 nəfər yaralanıb. Digər sakinlər ərazidən təxliyyə ediliblər. Yaralılar xəstəxanalara yerləşdiriliblər. Onlardan bəzilərinin vəziyyəti nisbətən ağırdır.

Hadisə yerinə yanğınsöndürənlər, xilasedicilər, həkimlər və hüquq-mühafizə xidmətinin əməkdaşları cəlb olunub. Ərazi mühasirəyə alınıb.

Araşdırmalar zamanı məlum olub ki, partlayışa təmir işləri aparan fəhlələrin texniki təhlükəsizlik qaydalarını pozması səbəb olub. Bu səbəbdən də, hadisə ilə əlaqədar texniki təhlükəsizliyə əməl edilməməsi maddəsilə cinayət işi başlanıb.

Hadisə ilə əlaqədar 30 nəfərdən çox insan dindirilib. Polislər ticarət pavilyonunun sahibi, onun atası və təmir işlərinə rəhbərlik edən şəxsi şübhəli şəxs qismində saxlayıblar.

Ziya Səccad
Ölkə.Az