Reks Tillerson: “ABŞ və Səudiyyə Ərəbistanı İrana qarşı birləşir”
“Ölkə.Az” xəbər verir ki, R.Tillerson Ər Riyadda Səudiyyə Ərəbistanının XİN rəhbəri Adil əl Cubeyrlə keçirdiyi birgə mətbuat konfransında deyib ki, Həsən Ruhani “terrorçuluğu maliyyələşdirmədə” və ballistik raketlərin sınaqdan keçirilməsində xüsusi təşəbbüs göstərir. Tillerson Ruhanini bu əməllərdən daşınmağa çağırıb.
“Mən ümid edirəm ki, Ruhani yeni prezidentlik dövründə İranın yaratdığı terror şəbəkəsini dağıdacaq. Bu şəbəkənin maliyyələşdirilməsinə son qoyacaq. Biz həmçinin ümid edirik ki, o ballistik raketlərin sınaqdan keçirilməsi proqramına son qoyacaq”, - deyə R.Tillerson bildirib.
Bundan başqa. Tillerson bildirib ki, ABŞ və Səudiyyə Ərəbistanı İrana qarşı birgə addımlar atacaq:
“Biz İrana qarşı səylərimizi birləşdirəcəyik. Əsasən də İranın terrorçulara dsətək verməsinə qarşı birgə tədbirlər görəcəyik. İran İraq və Suriyaya döyüşçü göndərməklə terrora qarşı mübarizə aparmır. Terrorçuları dəstəkləyir. Biz İrana bu çirkin əməlləri həyata keçirtməyə imkan verməyəcəyik”.
Qeyd edək ki, ABŞ ballistik raketləri sınaqdan keçirdiyinə görə İrana qarşı sanksiyalar tətbiq edib. ABŞ həmçinin İranı Livanın “Hizbullah” hərəkatını, Yəməndəki üsyançı husiləri və Suriyada hökumət qüvvələrini dəstəkləməklə bölgədə sabitliyi pozmaqda ittiham edir.
Ziya Səccad
Ölkə.Az
