Filippində İŞİD-lə hökumət qüvvələri arasında şiddətli döyüşlər gedir
“Ölkə.Az” xəbər verir ki, mayın 23-dən bəri Flippində İŞİD-lə əlaqəli Maute terror qruplaşması ölkənin bir neçə istiqamətində terror aktları törətməyə başlayıblar. Terrorçular əsasən dövlət binalarını və hərbi hissələri hədəfə alıblar.
Türrorçular ölkənin cənubundakı Mindanao vilayətini mühasirəyə götürüblər. Ərazidə yerləşən Maravi şəhərinə hücum edən terrorçular dinc əhaliyə divan tutublar.
Hökumət qüvvələrilə terror qruplaşmasının arasında baş verən toqquşmalarda 10-a yaxın hərbçi və polis ölüb. Döyüşlər zamanı 50-yə yaxın terrorçu məhv edilib.
Qeyd edək ki, Filippinin prezidenti Rodriqo Duterte ölkənin cənubundakı Mindanao vilayətində fövqəladə vəziyyət elan edib. Bu qərara səbəb Maute terror qruplaşmasının silahlıları tərəfindən sözü gedən vilayətin bir şəhərinin mühasirəyə alınmasıdır.
Dutertenin mətbuat katibi Ernesto Abella bu barədə xəbər verib. Xəbərə əsasən, Maravi şəhərində baş verən hadisələrə görə, Moskvada rəsmi səfərdə olan Filippin prezidenti konstitusiyanın ona verdiyi hüquqa dayanaraq vilayətdə 60 günlük fövqəladə vəziyyət elan edib.
Duterte baş verən hadisələrdən sonra Moskva səfərini yarımçıq qoyaraq Filippinə qayıdıb. Filippinin müdafiə naziri Delfin Lorenzana bildirib ki, toqquşmaya səbəb ordunun Maravi şəhərində terror qruplaşmasının liderinə etdiyi basqın olub. İnsident nəticəsində 2 hərbçi, 1 polis həlak olub. 12 nəfər isə yaralanıb.
Terrorçular şəhərdə bələdiyyə binası, xəstəxana və bir həbsxananı işğal ediblər. Eyni zamanda katolik kilsəsi və bir çox binanı da yandırıblar. Şəhərə elektrik enerjisi verilmir. Hər yerdə Maute qruplaşmasının snayperləri gəzişir.
Ziya Səccad
Ölkə.Az
