İran rəsmisi: “Suriyada və İraqda terrorçular ABŞ-ın maraqlarını qoruyur”

Suriyada və İraqda terrorçular ABŞ-ın maraqlarını təmin edirlər.

“Ölkə.Az” xəbər verir ki, bu barədə İranın ali milli təhlükəsizlik şurasının mətbuat katibi Əli Şamxani açıqlamasında bildirib. Onun sözlərinə görə, ABŞ prezidenti Donald Trampın Səudiyyə Ərəbistanına səfəri də buna əyani sübutdur.

“İran terrorla 4 onillikdir mübarizə aparır. Biz bu döyüşlərdə minlərlə vətəndaşımızı itirmişik. Amerika isə terrorun nə olduğunu ancaq 2001-ci il 11 sentyabrdan sonra bildi. Bütün dünyaya məlumdur ki, Suriya və İraqa terrorçular Səudiyyə Ərəbistanından göndərilir. Tramp isə ilk səfərini məhz ora etdi. Hansı ki, orada terrorçular yetişdirilir”, - deyə Əli Şamxani bildirib.

İran hökumətinin rəsmisinin sözlərinə görə, Suriya və İraqda ABŞ-ın terrora qarşı keçirdiyi əməliyyatlar da bu səbəbdən heç bir nəticə vermir: “Təkcə İran, Rusiya, Suriya və İraq koalisiya qüvvələri terrorla mübarizədə uğurlu nəticələr əldə edirlər”.

Ziya Səccad
Ölkə.Az