İranın Əfqanıstandakı səfiri ağır yaralanıb

"Ölkə.Az" xəbər verir ki, diplomat Almaniyanın Kabuldakı səfirliyi qarşısında törədilən terror aktı nəticəsində ağır xəsarət alıb.

Verilən məlumata əsasən, səfir Məhəmməd Reda Barhami ağır xəsarət alıb. Səfirliyin digər işçiləri isə sağ-salamatdır. Bundan başqa partlayış nəticəsində İran dövlət televiziya və radiosunun, İRNA dövlət informasiya agentliyinin nümayəndəlikləri zədələnib.

Kabulda bu gün kamikadze-terrorçu özünü avtomobildə partladıb. 90 nəfər həlak olub, 380 nəfər yaralanıb. Hələ ki, partlayışa görə heç bir qruplaşma məsuliyyəti öz boynuna götürməyib.

Almaniyanın xarici işlər naziri Ziqmar Qabriel bəyan edib ki, bu tip terror aktları ölkədə vəziyyəti stabilləşdirmək üçün Əfqanıstan hökumətinə kömək etməyə söz verən rəsmi Berlinin qərarını dəyişdirməyəcək.

Hikmət
Ölkə.Az