Bəşər Əsəd xalqa qarşı kimyəvi silahdan istifadə olunması barədə danışdı

"Ölkə.Az" xəbər verir ki, B.Əsəd müsahibəsində Suriya Ordusunda kimyəvi silah olmadığını bildirib. Onun sözlərinə görə, xalqa qarşı kimyəvi silah işlədilməsi barədə yayılan fikirlər Amerikanın növbəti yalanıdır.

“Aprelin 4-də Suriyanın Xan-Şeyhun yaşayış məntəqəsində əhaliyə qarşı heç bir kimyəvi silahdan istifadə edilməyib. Bu ittihamlar Suriya ordusunu və prezidentini gözdən salmaq üçün ortaya atılıb. Lakin ittihamlardan başqa, heç bir sübut yoxdur”, - deyə B.Əsəd bildirib.

Suriya diktatoru həmçinin əlavə edib ki, ölkəsində münaqişənin ən pis dövri artıq arxada qalıb.

Xatırladaq ki, Suriyanın Xan-Şeyhun yaşayış məntəqəsinə kimyəvi hücum aprelin 4-də baş verib. Hadisə nəticəsində 80-dən çox insan ölüb, 500-dən çoxu xəsarət alıb. Suriya ordusunun komandanlığı və silahlı müxalifət qüvvələri bir-birini kimyəvi silahdan istifadə etməkdə ittiham edib. 

Bundan sonra aprelin 7-ə gecə ABŞ-ın Aralıq dənizindəki hərbi gəmilərindən Əsəd ordusuna aid Şayrat aviabazasına 59 raket buraxılıb. Nəticədə aviabazanın uçuş-enmə zolağı, təyyarələrin dayanacağı və yanacaqdoldurma kompleksləri vurulub. Homs qubernatoru zərbə nəticəsində 5 hərbçi və 2 mülki şəxsin öldüyünü bildirib. Tramp Bəşər Əsəd rejimini aprelin 4-də İdlib əyalətində kimyəvi silahdan istifadə etməkdə ittiham edib. Tramp, raket zərbəsinin kimyəvi silahdan istifadənin təkrarlanmasının qarşısını almaq məqsədilə endirildiyini deyib.

Ziya Səccad
Ölkə.Az