Voleybola baxmaq istədiyi üçün həbs olunan qadın sərbəst buraxıldı

Kişilərlə voleybol matçını izləmək istəyən Qönçə Qavami sərbəst buraxılıb.

Ölkə.Az xəbər verir ki, İranda voleybol matçını kişilərlə birlikdə izləmək istədiyi üçün həbs cəzası alan İran əsilli İngiltərə vətəndaşı Qönçə Qavami sərbəst buraxılıb. Təqribən bir ay öncə kişilərlər birlikdə oyun izləmək istəyən Qavami 1 il müddətinə həbsə məhkum edilmişdi.

Azad olunmasını tələb edən və qərarı əsassız saydığı üçün Tehrandakı həbsxanada aclıq aksiyasi keçirən Qavami, şikayət ərizəsinin baxılması müddətində pul müqabilində azad edilib. Böyük qardaşı İman sərbəst buraxılan bacısının Tehrandakı ailəsinin evində qərarın veriləcəyini gözləmək məcburiyyətində olduğunu və hələ də həbs olunma ehtimalının istisna olmadığını söyləyib. Qərardan dərhal sona aclıq aksiyasına başlayan Qavaminin səhhətini səbəb göstərən ailəsi, qızının xəstəxanaya yerləşdirilməsi üçün məhkəməyə müraciət etmişdi. Şikayət ərizəsinə baxan hakim 25 yaşlı qadının pul müqabilində sərbəst buraxılmasına qərar verib.

Xatırladaq ki, 25 yaşlı Qönçə Qavami 20 iyunda Tehranda yerləşən stadionlardan birinin yanında tutulmuşdu. Britaniya vətəndaşı olan xanım Dünya Liqası çərçivəsində kişilər arasında keçirilən voleybol matçına baxmaq istəyirmiş.

Rəşid Mustafazadə

Ölkə.Az