Cənubi Sudanda toqquşma

"Ölkə.Az" xəbər verir ki, qəbilələrin toqquşmasında 38 nəfər həlak olub, 35 nəfər isə yaralanıb. Bu barədə Cənubi Sudanın Qoqrial əyalətinin icra başçısının müavini Aqot Mel xəbər verib. Xəbərə əsasən toqquşma ölkənin şimalında qeydə alınıb.

 

Mel bildirib ki, toqquşmalar sərhəd anlaşılmazlığı, otlaq ərazisi və su bölüşümü ucbatından baş verib. Hər iki qrup bir-birlərindən intiqam almaq istəyir. Bundan başqa Cənubi Sudanda baş verən toqquşma və kütləvi qətliamlardan sonra ölkədə qeyri-sabitlik artır, mülki vətəndaşlar silaha sarılır.

 

Sudandan ayrılaraq müstəqilliyini elan edən Cənubi Sudanın prezidenti Salva Kiir Mayardit 16 dekabr 2013-cü ildə köməkçisi Riek Maçarı çevriliş təşəbbüsündə ittiham edərək vəzifəsindən azad etmişdi. Bu vaxtdan etibarən Cənubi Sudanda vətəndaş müharibəsi başlayıb. Müharibə nəticəsində 50 min insan həlak olub, milyonlarla vətəndaş evini tərk etmək məcburiyyətində qalıb. 2015-ci ildə sülh olsa da, 2016-cı ildən Mayarditə bağlı təhlükəsizlik qüvvələri ilə Maçar tərəfdarları arasında münaqişə yenidən alovlanmışdı.