ABŞ-ın rəhbərlik etdiyi koalisiya qüvvələri Suriya ordusuna zərbələr endirdi

"Ölkə.Az" xəbər verir ki, zərbələr Suriyanın cənubunda münaqişələrin qarşısını almaq üçün Bəşər Əsədə dəstək olan qüvvələrə qarşı tətbiq edilir. Zərbə endirilən hökumət qüvvələri 60 hərbçi, artilleriya, hava hücumundan müdafiə vasitələrindən ibarət olub.

Koalisiya qüvvələrindən bildirilib ki, əməliyyat müdafiə xarakteri daşıyıb.

“Bizim tərəfdən Suriya ordusuna xəbərdarlıq edildi ki, koalisiya qüvvələrinin təhlükəsizliyinə qarşı hərəkətlər edilir. Lakin xəbərdarlıqlara əhəmiyyət verilmədi. Bu səbəbdən Suriya ordusuna zərbələr endirildi. Koalisiya qüvvələri Bəşər Əsəd tərəfdarları ilə müharibə etmək fikrində deyil. Lakin Suriya ordusu gərginlik olan əraziləri nəzarətdə saxlayarsa, xəbərdarlıqlara əhəmiyyət verməzlərsə, güc tətbiq etmək məcburiyyətində qalacağıq”, - deyə məlumatda bildirilib.

Əməliyyatlar zamanı Rusiya hərbi qüvvələri heç bir zərər görməyiblər.

Keçirilən əməliyyatlardan sonra ABŞ prezidenti Donald Tramp bu barədə məlumatlandırılıb. Ağı Evdən isə hələlik keçirilən əməliyyatlar barədə heç bir rəsmi açıqlama verilməyib.

Qeyd edək ki, bu ilin aprel ayının 7-də də ABŞ-ın Aralıq dənizindəki hərbi gəmilərindən Əsəd ordusuna aid Şayrat aviabazasına 59 raket buraxılıb. Nəticədə aviabazanın uçuş-enmə zolağı, təyyarələrin dayanacağı və yanacaqdoldurma kompleksləri vurulub. Homs qubernatoru zərbə nəticəsində 5 hərbçi və 2 mülki şəxsin öldüyünü bildirib. Tramp Bəşər Əsəd rejimini aprelin 4-də İdlib əyalətində kimyəvi silahdan istifadə etməkdə ittiham edib. Tramp, raket zərbəsinin kimyəvi silahdan istifadənin təkrarlanmasının qarşısını almaq məqsədilə endirildiyini deyib.

Ziya Səccad
Ölkə.Az