İŞİD terrorçusu Parisdə polislərə hücum etdi

Fransanın paytaxtı Parisdə terror aktı törədilib.

"Ölkə.Az" xəbər verir ki, bu barədə “BFMTV” kanalı Fransa polisinə istinadən bildirilib. Verilən məlumata görə, Notr-Dam kilsəsinin yaxınlığında 40 yaşlı ərəb əsilli şəxs polisə hücum edib. O, polisi çəkiclə vurub. Hadisə yerli vaxtla saat 16:30-da baş verib.

Həmin şəxs polisə hücum edərək bir hüquq-müdafiə əməkdaşını yaralayıb. O, qışqıraraq özünü İŞİD əsgəri adlandırıb.

“Suriya üçün sizə ölüm olsun”, - deyə həmin şəxs qışqırıb. Polislər həmin şəxsə atəş açaraq onu yaralayıblar. Yaralı şəxsin üzərindən bıçaq və tapança da çıxıb. Yaralı şəxsi xəstəxanaya yerləşdiriblər.

Hadisə baş verən vaxt ərazidə 900-ə yaxın turist olub. Polis dərhal ərazidə təhlükəsizlik tədbirləri görüb. Ətraf mühasirəyə alınıb.

Fransa DİN rəhbəri Jerar Kolon hücum edən şəxsin Əlcəzair mənşəli tələbə olduğunu qeyd edib.

Hadisə ilə bağlı Parisin meri “Twitter” hesabında Fransanın polislərinə təşəkkür edir. O, terrorçunu zərərsizləşdirdiklərinə görə, Fransa polislərini qəhrəman hesab edib.

Ziya Səccad
Ölkə.Az