Qətər İran və Türkiyə ilə ərzaq və su təminatı üzrə danışıqlar aparır

"Ölkə.Az" xəbər verir ki, Qətər hökuməti əmirliyi ərzaq və içməli su ilə təmin etmək üçün İran və Türkiyə ilə danışıqlar aparır.

 

Bu barədə Qətər hökumətinin rəsmi nümayəndəsi məlumat verib. Məlumatda deyilir:
"Biz Türkiyə, İran və digər dövlətlərlə danışıqlar aparırıq. Yüklərin çatdırılması "Qatar Airways" şirkətinin yük reysləri vasitəsilə həyata keçiriləcək. Qətər bazarlarında cəmi 4 həftəlik buğda ehtiyatı qalıb. Ölkə rəhbərliyi Doha şəhərində böyük, strateji ərzaq ehtiyatına da sahibdir".

 

Həftənin ikinci günü ticarət-sənaye palatasının rəhbəri şeyx Xəlifə ben Casem əl Tani bəyan edib ki, Qətərin boykot edilməsi barədə qərar əmirliyə ərzaq və xammal məhsullarının gətirilməsində problem yaratmayacaq. Şeyx eyni zamanda qeyd edib ki, əmirliyin strateji ehtiyatı ən azı 12 ay bəs edər. Bundan başqa ölkəyə gətirilən ərzaq və xammalın 95 %-i su və hava yolu ilə daşınır. Səudiyyə ilə sərhəddən cəmi 5 % ərzaq və xammal gətirilir.