Mosuldan acı statistika

BMT son günlər Mosuldan qaçmağa çalışan mülki əhalinin İŞİD tərəfindən qətlə yetirildiyini açıqlayıb.

"Ölkə.Az" xəbər verir ki, Koalisiya qüvvələrinin hava hücumunda da 80 nəfərə yaxın dinc sakin həlak olub. BMT-nin hesabatına əsasən 31 may tarixində İraqın Mosul şəhərində beynəlxalq koalisiya qüvvələrinin İŞİD terror qruplaşmasına qarşı həyata keçirdiyi hava hücumları nəticəsində 80 nəfərə yaxın mülki vətəndaş həlak olub. Son günlərdə şəhərdən qaçmağa çalışan 231 dinc sakin isə İŞİD terrorçuları tərəfindən qətlə yetirilib.

BMT İnsan Haqları Ali Komissarlığının açıqlamasına əsasən Mosul əməliyyatı başladığı gündən bu yana şəhərdəki dinc sakinlər terrorçular tərəfindən canlı qalxan kimi istifadə edilir. Açıqlamada bildirilir ki, BMT-nin əldə etdiyi məlumata əsasən keçən həftə 204, 26 maydan bu günə qədər isə 231 mülki vətəndaş Mosuldan qaçmağa çalışarkən İŞİD tərəfindən qətlə yetirilib. Ölənlər arasında qadın və uşaqların sayı əksəriyyət təşkil edir.

Açıqlamada toqquşmalarda iştirak etməyən dinc sakinlərin qətliamı müharibə cinayəti kimi qeydə alınıb.

Hikmət
Ölkə.Az