ABŞ-ın rəhbərlik etdiyi koalisiya Bəşər Əsəd tərəfdarlarına yenidən zərbə endirib

"Ölkə.Az" xəbər verir ki, bu barədə ABŞ liderliyindəki koalisiya qüvvələrinin sözçüsü polkovnik Ryan Dillon bildirib. Onun sözlərinə görə, məhv edilən qüvvələr koalisiyaya qarşı təhlükə yaradırmışlar.

“Həmlə nəticəsində Bəşər Əsəd tərəfdarlarına məxsus tank, artilleriya, havadan müdafiə vasitələri, üzərinə silahlar quraşdırılmış texniki avtomobillər məhv edilib. Əməliyyat At-Tanfa rayonunda  hökümətyönümlü qüvvələrin məskunlaşdığı ərazidə keçirilib”, - deyə Ryan Dillon bildirib.

Qeyd edək ki, koalisiya iyunun 6-da Suriyada hökümətyönümlü qüvvələrə zərbə endirmişdi. Həmlə nəticəsində Bəşər Əsəd tərəfdarlarına məxsus tank, artilleriya, havadan müdafiə vasitələri, üzərinə silahlar quraşdırılmış texniki avtomobillər və 60-dan çox hərbçi məhv edilib.

Rusiya ABŞ-ın rəhbərlik etdiyi koalisiya qüvvələrinin Suriya ordusuna endirdiyi zərbələrdən sonra BMT-dən hesabat tələb edib. Bu barədə Rusiya Federasiya Şurasının Müdafiə və Təhlükəsizlik Komitəsinin sədr müavini Frans Klinçeviç bildirib. Onun sözlərinə görə, Rusiya tərəfi Təhlükəsizlik Şurasından fövqəladə iclas çağırmağı tələb edib. Təlabatda bildirilib ki, ABŞ Bəşər Əsəd qüvvələrinə vurulan zərbələri izah etməlidir.

“ABŞ-ın rəhbərlik etdiyi koalisiya qüvvələrinin hökümət yönümlü hərbçilərə etdiyi həmlə Suriyada birbaşa müharibənin elan olunması deməkdir. Bu aqresiv addımdır. Rusiya dərhal bu məsələnin araşdırılmasını tələb edir”, - deyə Frans Klinçeviç bildirib.

Onun sözlərinə görə, bu hücum hərbi səhv olmayıb: “Bu düşünülmüş hərbi həmlədir. Bu hücum Suriyada hökümət qüvvələrinin zəiflədilməsinə hesablanıb. Bu hücum hərbi səhv deyil”.

Ziya Səccad
Ölkə.Az