Tillerson və Lavrov Əsəd qüvvələrinin bombalanmasını müzakirə ediblər

"Ölkə.Az" xəbər verir ki, iki ölkə nümayəndəsi iyunun 10-da telefon vasitəsilə danışarkən bu barədə də müzakirələr aparıblar. Bu barədə Rusiya Xarici İşlər Nazirliyinin mətbuat xidmətindən bildirilib. Verilən məlumata görə, söhbət zamanı həm də Suriyadakı vəziyyətlə bağlı fikir mübadiləsi aparılıb.

“Lavrov Amerika tərəfini gələcəkdə bu cür hadisələrin qarşısını almaq üçün konkret tədbirlər görməyə çağırıb”, - deyə Rusiya XİN məlumat yayıb.

Danışıqlar zamanı tərəflər Suriyadakı münaqişə ilə bağlı gələcəkdə hansısa tədbirlər görülməzdən əvvəl məsləhətləşmələrin aparılması barədə razılığa gəliblər.

Qeyd edək ki, iyunun 8-də ABŞ-ın rəhbərlik etdiyi koalisiya Suriyada Bəşər Əsəd tərəfdarlarına yenidən zərbə endirib. Artıq üçüncü dəfədir ABŞ-ın rəhbərlik etdiyi koalisiya Əsəd tərəfdarlarını bombalayır.

Koalisiya iyunun 6-da da Suriyada hökümətyönümlü qüvvələrə zərbə endirmişdi. Həmlə nəticəsində Bəşər Əsəd tərəfdarlarına məxsus tank, artilleriya, havadan müdafiə vasitələri, üzərinə silahlar quraşdırılmış texniki avtomobillər və 60-dan çox hərbçi məhv edilib.

Ziya Səccad
Ölkə.Az