Ağ Evdən Trampın məhkəməsilə bağlı açıqlama
"Ölkə.Az" xəbər verir ki, Ağ Evin mətbuat katibi Şon Spayser bu mövzuda brifinq keçirib. O, birfinqdə bildirib ki, Trampın biznes maraqları Amerikanın konstitusiyasını pozmur.
“Gedişatı diqqətlə izləsək, bundan nəticə çıxartmaq elə də çətin deyil. Bu məsələ həmişə nəzarətdədir. Hələlik ölkə başçısının biznes maraqları ölkənin qanunlarına zidd deyil”, - deyə Ş.Spayser bildirib.
Qeyd edək ki, bu gün Vaşinqton və Merilend ştatlarının prokurorları prezident Donald Trampı məhkəməyə veriblər. Onlar Trampı konstitusiyanın anti-korrupsiya maddəsini pozmaqda ittiham ediblər. Onların sözlərinə görə, ABŞ prezidenti əvvəlki kimi əmlak əməliyyatlarında iştirak edir və bununla da ölkə konstitusiyasını pozmuş olur.
Baş prokurorlar həm də ötən il Ağ Evin yaxınlığında istifadəyə verilən "Trump İnternational Hotel"in fəaliyyətindən də narahatdırlar. Küveyt səfirliyi bu mehmanxanada tədbir keçirib. Amma əvvəlcədən "Four Seasons" oteli icarəyə götürülmüşdü. Trampın inauqurasiyasından sonra Səudiyyə Ərəbistanı da dəfələrlə oteldə nömrə götürüb. Prokurorlar Trampdan vergi deklarasiyası tələb edəcəklər. Onların fikrinə görə, işə Ali Məhkəmədə baxılacaq.
Qeyd edək ki, bu ilin yanvar ayında D. Tramp sahib olduğu şirkətlərin böyük oğlanlarına verəcəyi barədə bildirmişdi. Nyu-Yorkda keçirdiyi mətbuat konfransı zamanı Tramp bildirmişdi ki, vəzifəsinin icrasına başlayan zaman ABŞ-ın bütün qanunlarına tam şəkildə əməl edəcək və sahibkarlıqdan əl çəkəcək.
“Mən bütün şirkətləri böyük oğlanlarıma təhvil verəcəyəm. Vəzifəmin icrasına başlayandan sonra şirkətlərimi iki oğlum idarə edəcək. Onlar bu sahəbə mənimlə heç bir məsləhətləşmələr aparmayacaqlar”, - deyə Tramp vurğulamışdı.
Ziya Səccad
Ölkə.Az
