Tanınmış kinorejissor Putinin ürəyini necə "oğurladı"?
"Ölkə.Az" xəbər verir ki, bu barədə kinorejissor “Los Angeles Times”ə verdiyi açıqlamada bildirib. Onun sözlərinə görə, hazırlayacağı filmin mövzusunu, sualları özü hazırlayıb və bu baxımdan ona heç bir təzyiq olunmayıb.
“Heç bir suala qadağa qoyulmadı. Düşünürəm ki, suallar barədə tam ətraflı filmdən əvvəl yazmaq lazım deyil. Filmin hazırlanmasında bütün gedişat bizim nəzarətimizdə olub”, - deyə Oliver Stoun bildirib.
Kinorejissor deyib ki, məqsədi çətin suallar vermək olmayıb. Sadəcə Putini yaxşı tanımaq və onun düşüncələrini tam öyrənmək istəyib. O.Stoun hesab edir ki, Putinlə müsahibə zamanı bir az sərt danışsaydı və çətin suallar versəydi, heç bir uğura imza ata bilməzdi.
“İlk öncə mütləq müsahibə götürdüyün şəxsə inanmaq lazımdır. Həmin şəxslə ünsiyyət qurmağı bacarmaq lazımdır. Müsahibə götürən zaman çalışmıram ki, özümü son dərəcə ağıllı göstərim. Bu müsahibənin keyfiyyətli olmasına mane olar. Bununla yaxşı nəticə əldə etmək olmaz”, - deyə kinorejissor əlavə edib.
Kinorejissor onu da bildirib ki, filmin çəkilişi üçün Putini müsahibə verməyə razı salmaq çətin olmayıb: “Mən Rusiyanı yaxşı tanıyıram. Onun tarixi, dili və dini barədə məlumatlıyam. Bu faktlar da kömək etdi ki, Putini müsahibəyə razı salıb”.
Qeyd edək ki, Putin tanınmış kinorejossora böyük müsahibə verib. Müsahibə iyunun 12-15-də Amerikanın “Showtime” kanalında yayımlanacaq filmdə yer alacaq. Filmdə Putinin 2000-ci ildə ilk dəfə Rusiya prezidenti seçildikdən sonra dünyada baş verən hadisələrə münasibəti göstəriləcəkdir.
O.Stoun kəskin siyasi mövzularda filmlər çəkən rejissor kimi məşhurdur. Onun qəhrəmanları arasında ABŞ prezidentləri Riçard Nikson, Con Kennedi, Corc Buş var.
Ziya Səccad
Ölkə.Az
