Türkiyə Rusiyaya 322,18 ton çiyələk, 2,92 ton üzüm ixrac edib

"Ölkə.Az" xəbər verir ki, bu barədə Federal Gömrük Xidmətindən məlumat verilib. Verilən məlumata görə, Türkiyədə yetişdirilən üzüm və çiyələk Rusiya bazarlarına buraxılıb.

Rusiya gömrüyündən qeyd edilib ki, hökumətin 2 iyun 2017-ci il tarixli, 672 saylı sərəncamına əsasən Türkiyənin kənd təsərrüfatı məhsullarının Rusiyaya ixracı bərpa edilib. Nəticədə Rusiyaya 322,18 ton çiyələk, 2,92 ton üzüm ixrac edilib.

Qeyd edək ki, pomidor da daxil olmaqla Türkiyədən 13 məhsulun Rusiyaya girişinə icazə verilmirdi. Bu istiqamətdə müxtəlif vaxtlarda qarşılıqlı danışıqlar aparılsa da, məsələ öz həllini ötən ay tapdı. İki ölkə başçısının qarşılıqlı razılığından sonra Türkiyə və Rusiya qarşılıqlı olaraq ticarət məhdudiyyətlərinin aradan götürülməsinə dair bəyanat imzalanıb. Sənəd iki ölkənin hökumət başçılarının müavinləri Arkadi Dvorkoviç və Mehmet Şimşek tərəfindən İstanbulda imzalanıb. Mərasimdə Türkiyənin baş naziri Binəli Yıldırım və Rusiyanın baş naziri Dmitri Medvedev də iştirak edib.

Ziya Səccad
Ölkə.Az