Moskvada erməni iş adamı qətlə yetirildi
Rusiyanın paytaxtı Moskva şəhərində güllələnmə hadisəsi baş verib.
"Ölkə.Az" xəbər verir ki, bu barədə Rusiya İstintaq Komitəsinin Moskva üzrə Baş İstintaq İdarəsinin rəhbəri Yulya İvanova məlumat verib. Onun sözlərinə görə, hadisə zamanı erməni iş adamı ağır yaralanıb.
Hadisə bu gün Rusiya vaxtı ilə saat 08:10-da qeydə alınıb. Naməlum şəxs, yaxud şəxslər 57 yaşlı Vaçik Abqaryanı Vereyski küçəsində, öz ofisinin qarşısında atəşə tutublar. Sinəsindən yaralanan iş adamı xəstəxanaya yerləşdirilib. Həkimlərin səyinə baxmayaraq, biznesmenin həyatını xilas etmək mümkün olmayıb.
“Hazırda hadisə ilə bağlı araşdırmalar aparılır. Hadisəni törədən şəxsin kimliyi müəyyənləşdirilir”, - deyə Yulya İvanova bildirib.
Qeyd edək ki, V. Abqaryan Moskvada tikinti şirkətlərindən birinə rəhbərlik edirdi.
Ziya Səccad
Ölkə.Az
