Ukraynanın dövlət kanalını rus qızına görə cərimələdilər
"Ölkə.Az" xəbər verir ki, Avropa Yayım Birliyi Ukrayna İctimai Televiziyasını cərimələyib. Bu barədə qurumun yaydığı bəyanatda bildirilib. Qeyd edilib ki, Ukrayna İctimai Televiziyasının Rusiyanı təmsil edən Yuliya Samoylovanın yarışmada iştirakını təmin etmədiyi üçün cərimələnib. Cərimənin məbləği haqqında məlumat verilmir.
Yayılan bəyanatdan sonra rəsmi Kiyevin cavabı gecikməyib. Ukrayna hökuməti bəyanata etirazını bildirib. Qeyd edilib ki, Avropa Yayım Birliyinin qəbul etdiyi qərar əsassızdır.
“Ukrayna İctimai Televiziyası külli miqdarda cərimələnib. Onlar bunu Rusiya təmsilçisinin yarışmada iştirak etməməsilə əsaslandırıblar. Lakin bu qərar əsassızdır. Çünki Ukrayna dövlətinin qanunları “Eurovision” mahnı müsabiqəsinin qanunlarından üstündür. Bu dövlət qanunudur və dövlət qanunu bütün yarışların daxili qaydalarından da üstündür”, - deyə açıqlamada bildirilib.
Vurğulanıb ki, Rusiya Krımı işğal edib. Ukrayna bu əməllə razı deyil. Bu səbəbdən də, Ukrayna işğalçı dövlətin təmsilçisini öz sərhədlərinə buraxmayıb.
Qeyd edək ki, “Eurovision 2017” mahnı yarışması may ayında Kiyevdə keçirilib. Rusiya isə bu il yarışmada iştirak etməyib. Belə ki, Ukrayna tərəfi təhlükəsizlik məsələlərini əsas gətirərək Rusiyalı müğənni Yuliya Samoylovaya viza verməyib. “Eurovision” Mahnı müsabiqəsinin təmsilçiləri Rusiyaya təklif ediblər ki, müğənninin ifası canlı olaraq Rusiyada kanalların birində sputnik vasitəsilə yayımlansın. Lakin Rusiyanın 1-ci kanalı bunu düzgün hesab etməyib və Rusiya yarışda iştirak etməkdən imtina edib. Bir müddət əvvəl Avropa Yayım Birliyi Rusiya təmsilçisi ətrafında yaranmış vəziyyətin yarışmanın nüfuzuna xələl gətirdiyini bəyan edib.
Ziya Səccad
Ölkə.Az
