Trampla aparıcı arasında qalmaqal
"Ölkə.Az" xəbər verir ki, bu dəfə Trampın sözü NBC telekanalının iki aparıcısı ilə çəp gəlib. Amerika prezidenti kanalda səhər saatlarında yayımlanan “Morning Joe” adlı xəbərlər proqramının aparıcıları Mika Brzezinski və Joe Skarboronu təhqir edib.
Tramp “Twitter” sosial şəbəkəsindəki hesabında aparıcıların birini dəli, digərini isə psixi xəstə adlandırıb.
“Eşitdiyimə görə, reytinqi çox aşağı olan “Morning Joe” adlı xəbərlər proqramında mənim barəmdə pis danışırlar. Əvvəllər bir-iki dəfə həmin proqrama baxsam da, sonralar çox mənasız xəbərlər verildiyi üçün onlara baxmıram. İndi verilişin dəli aparıcısı Mika və psixi xəstə olan digər aparıcı Joe əvvəllər mənimlə görüşmək istəyirdilər. İndi onlar məni pisləyirlər? Bir dəfə Mika Mar-a-Laqoya gəlib mənimlə görüşmək istəyirdi. Həmin gün onun halı çox pis idi. Həkimlər dedilər ki, o psixi xəstəlikdən əziyyət çəkir. Mən onu qəbul etmədim. Həmin vaxt o, plastik əməliyyat olunmuşdu”, - deyə Tramp qeyd edib.
NBC telekanalının rəsmi nümayəndəsi Mark Kornblau Trampın verilişin reytinqi barədə səsləndirdiyi fikirlərə cavab verib. Kanal təsmisi “Twitter”dəki hesabında yazıb ki, Tramp nə dediyini bilmir: “Maraqlıdır, ABŞ-ın rəhbəri “reytinqi çox aşağı olan” veriliş barədə niyə danışır?”
Qeyd edək ki, D.Tramp hakimiyyətinin 6 ayı ərzində həm Amerika, həm də dünya mətbuatında jurnalistlərin “sevmədiyi rəhbər”ə çevrilib. Son vaxtlar elə gün olmur ki, ABŞ KİV-lərində Trampı tənqid etməsinlər. Amerika rəhbəri də öz növbəsində mətbuat nümayəndələrini tənqid və təhqir edir.
Xatırladaq ki, yanvar ayında Nyu-Yorkda keçirdiyi mətbuat konfransı zamanı BBC–nin müxbiri ilə Tramp arasında qalmaqal yaşanmışdı. Belə ki, jurnalist ABŞ-ın yeni prezidentinə sual vermək istəyib. Tramp isə jurnalistə sual vermək imkanı yaratmayıb.
“Xahiş edirəm, səssiz olun və yerinizdə oturun. Sizə sual vermək haqqı vermirəm. Siz yalan xəbər yayan informasiya mənbəyisiniz”, - deyə Tramp jurnalistə qışqırıb.
Müxbir isə öz növbəsində Trampa etirazını bildirib: “Siz bizim şirkəti təhqir edirsiz”.
Tramp da onu cavabsız buraxmayıb və daha sərt reaksiya verib: “Sizin şirkət hörmətə layiq deyil. Şirkətiniz olduqca bərbaddır”.
Ziya Səccad
Ölkə.Az
