Marsda ilk insanlar 35 il əvvəl olub

1979-cu ildə iki nəfər Marsda ola bilərdimi?

Ölkə.Az ABŞ mətbuatına istinadən bildirir ki, kosmos aləmində sensasion xəbər yayılıb. Belə ki, özünü NASA-nın keçmiş əməkdaşı adlandıran qadın bəyan edib ki, kosmik zondun yayımlanması zamanı Mars planeti üzərində hərəkət edən insan fiqurlarını görüb. ABŞ-da radiostansiyaların birinin efirində qadın 1979-cu ildə skafandrlı iki şəxsi gördüyünü iddia edib.

Onun sözlərinə görə, bu mənzərəyə, Marsdan birbaşa yayım aparan "Viking" adlı robotun videosunda rastlaşıb. Özünü Ceki kimi təqdim edən qadın bildirir ki, NASA-da işlədiyi vaxtda "Viking"-in Yer kürəsi ilə qurduğu telemetrik əlaqəyə nəzarət edirmiş.

O iddia edir ki, insanlar 1979-du ildə Qırmızı Planetə ayaq basıblar və özündən savayı daha 6 nəfər bu görüntülərin şahidi olub. Ceki qeyd edir ki, qurğu ilə əlaqə kəsiləndə gördüklərini başqalarına danışmaq üçün otağı tərk etmiş, lakin qayıtdıqda həmin məkanın qapılarının bağlı olduğunu görmüşdü. Cekinin sözlərinə əsasən, videoda olan astronavtların skafandrları ABŞ-da o vaxtlar istifadə edilənlərdən kəskin fərqlənirdilər və buna görə də o, həmin şəxslərin hansı ölkənin nümayəndələri olduğunu müəyyən edə bilməmişdi.

Cekinin radiostansiyaya müraciət etməkdə məqsədi isə "1979-cu ildə iki nəfər Marsda ola bilərdimi?" sualına cavab tapmaqdır. Hələlik NASA-nın rəsmi nümayəndələri qadının bəyanatını şərh etməyiblər

Rəşid Mustafazadə

Ölkə.Az