Hüsnü Mübarəkin əfvi etirazlara səbəb oldu

"Mübarəkin hökuməti günahsızdır, mənəm günahkar"

Ölkə.Az xəbər verir ki, Misirin keçmiş prezidenti Hüsnü Mübarək haqqında bəraət qərarının verilməsi ölkənin müxtəlif şəhərlərində etirazlara səbəb olub.

Aralarında müxtəlif partiya, hərəkat nümayəndələrinin olduğu çoxlu sayda etirazçılar 25 Yanvar inqilabının simvolu sayılan Təhrir meydanının piyada və nəqliyyat yolunun bağlanması səbəbiylə Abdulmunim Riyad Meydanında toplaşıblar. Nümayişçilər Hüsnü Mübarək və o dövrün digər tanınmış simaları əleyhinə şüarlar səsləndiriblər.

İsgəndəriyyənin Kleopatra bölgəsində də gənclər hərəkatının geniş iştirakı ilə reallaşan və tanınmış fəal Mahinur əl-Misrinin də olduğu narazı qüvvələr Mübarək haqqında bəraət qərarının verilməsinə etiraz ediblər. İsmailiyyə və Port Səiddə təşkil edilən nümayişlərdə isə "Mübarəkin hökuməti günahsızdır, mənən günahkar" yazılı plakatlar asılıb.

Xatırladaq ki, bu gün Misir məhkəməsi eks-prezident Hüsnü Mübarəkə bəraət qazandırmışdı. O, 2011-ci ildə "Ərəb baharı" zamanı baş verən qarşıdurmalarda 1000 nəfərə yaxın nümayişçinin öldürülməsində günahlandırılırdı.

Rəşid Mustafazadə

Ölkə.Az